Santiago de Compostela, 31 de agosto de 2026

A conselleira do Mar, Marta Villaverde, acompañada pola directora xeral de Desenvolvemento Pesqueiro, Ángeles V. Suárez, e persoal técnico do Centro de Investigacións Mariñas de Galicia (CIMA), mantivo unha reunión co catedrático emérito de Microbioloxía da Universidade de Santiago de Compostela (USC), Juan Luis Barja, para abordar a situación dos proxectos científicos orientados á mellora sanitaria e produtiva dos moluscos nas nosas rías.

A titular de Mar destacou que Galicia dispón dunha rede de centros de investigación e equipos universitarios punteiros e de referencia internacional, cuxo traballo resulta decisivo para deseñar respostas eficaces fronte aos actuais desafíos do sector, tales como os episodios de mortalidade de bivalvos ou os posibles efectos do cambio climático.

Neste sentido, Villaverde subliñou a aposta por canalizar este coñecemento a través de ferramentas estratéxicas como a plataforma Redemar, que conecta de xeito directo á comunidade investigadora co tecido produtivo para impulsar iniciativas conxuntas. A responsable autonómica remarcou o compromiso da Xunta con esta alianza entre ciencia e sector para blindar a súa actividade, protexer o emprego no litoral e garantir a competitividade futura do complexo mar-industria.