Santiago de Compostela, 1 de setembro de 2026

O Servizo Galego de Saúde vén de asinar un convenio de colaboración coa Sociedade Oncolóxica de Galicia para a súa incorporación como socio científico, coa finalidade de colaborar no desenvolvemento do Centro de Coidado Integral do Cancro de Galicia.

A Xunta ten como proxecto estratéxico a acreditación da sanidade pública galega como centro de referencia contra o cancro, xa que Galicia foi designada pola Unión Europea como candidata a formar parte dunha rede europea de excelencia. 

Así, a Sociedade Oncolóxica de Galicia presentoulle ao Servizo Galego de Saúde o seu interese en colaborar activamente no proxecto co fin de sumar a súa capacidade científica e a súa rede profesional.

Deste xeito, a Xunta facilitaralle á sociedade a información necesaria sobre a estrutura, organización e funcionamento do Centro de Coidado Integral do Cancro de Galicia. Tamén se promoverá que os profesionais sanitarios do sistema público galego participen nas actividades formativas, nos grupos de traballo e nas redes científicas que organice ou coordine a sociedade. 

Ademais, a Xunta colaborará coa Sociedade Oncolóxica de Galicia nas actividades de difusión que se organicen para comunicar os avances no proceso de certificación do centro, que culminarán en 2028.

Oncoloxía próxima e de vangarda

O Centro de Coidado Integral do Cancro de Galicia non disporá dunha sede física senón que será un modelo organizativo que agrupa todos os recursos asistenciais destinados á atención ao cancro no ámbito do sistema público sanitario galego, co traballo en rede dos profesionais e servizos das sete áreas sanitarias, tres institutos de investigación biomédica e a Axencia Galega para a Xestión do Coñecemento en Saúde.

O obxectivo principal é consolidar Galicia como un referente de excelencia e calidade nesta materia, garantindo que os avances científicos se apliquen de forma efectiva na práctica clínica e que todos os galegos e galegas teñan acceso a unha atención oncolóxica de calidade, vivan onde vivan, e seguindo os máis altos estándares europeos de calidade e equidade.

Esta estrutura integrará nun mesmo sistema a prevención, o diagnóstico, o tratamento, a investigación e a innovación. Trátase dun modelo que beneficiará tanto aos pacientes, que accederán a terapias máis innovadoras; como aos profesionais, que verán reforzado o seu liderado; e ao propio sistema, que gañará prestixio e atraerá talento e financiamento.

Galicia dispón dos alicerces necesarios para aspirar ao selo de excelencia e iniciou o traballo cara a acreditación en marzo, coa creación do Comité Operativo e do Grupo Técnico de acreditación, que se encarga das tarefas de dirección, coordinación técnica e seguimento integral do proceso. 

Na seguinte fase, a de autoavaliación, comprobarase que o proxecto galego se adecúa aos máis de 300 estándares propostos en ámbitos como a gobernabilidade, o coidado ou a integración da investigación. Seguiralle a fase da auditoría, prevista no primeiro semestre de 2028 ata acadar a certificación definitiva, que se decidirá no último trimestre dese mesmo ano.