Meaño (Pontevedra), 3 de setembro de 2026

A Xunta somete a información pública o proxecto da senda peonil e ciclista de 1,2 quilómetros entre Picón e Tanoira, no concello de Meaño. A conselleira de Vivenda e Planificación de Infraestruturas, María M. Allegue, deu conta hoxe desta actuación na estrada PO-303, na que se prevé un investimento de máis de 720.000€, susceptible de financiamento con fondos FEDER.

A conselleira enmarcou esta nova actuación no compromiso da Xunta pola mobilidade sostible, segura e saudable a través destes itinerarios de uso compartido entre peóns e ciclistas que a Xunta está a habilitar nas estradas autonómicas. 

Allegue destacou que a senda permitirá habilitar neste treito de máis de un quilómetro, que discorre tamén polo núcleo de Pazos, un itinerario continuo e seguro para facilitar os desprazamentos a pé e en bicicleta nun tramo que ten unha intensidade media de tráfico de máis de 2.000 vehículos diarios, e no que ademais se sitúan vivendas unifamiliares, accesos desde a estrada e núcleos de poboación, de xeito que a veciñanza verase moi beneficiada coa actuación.

“Seguimos avanzando -destacou- nestes percorridos accesibles que son marca da nosa Galicia calidade, que convidan a pasear, facer deporte pero tamén descubrir a riqueza dos nosos concellos”.

Será unha senda de 2 metros de ancho na meirande parte do percorrido, que inclúe tamén actuacións complementarias como a adaptación da senda ás entradas das vivendas, a adaptación dunha parada de autobús, nova sinalización e instalación de mobiliario urbano.  Ademais, prevense dous novos pasos de peóns para incrementar a seguridade, xa que incorporan elementos pensados para as persoas con dificultades visuais 

Tras a publicación hoxe no Diario Oficial de Galicia, o proxecto permanecerá a exposición pública ata o 16 de outubro e as persoas interesadas poderán presentar suxestións a partir de mañá venres, 4 de setembro.

Unha vez que finalice este período de exposición pública, a conselleira indicou que se axilizará no posible a tramitación para poder licitar as obras este ano. Posteriormente, unha vez adxudicadas, o prazo de execución será de 12 meses.

A Xunta ten en marcha proxectos e obras de sendas na provincia pontevedresa por importe de preto de 24M€, en concellos como Pontevedra, Marín, Bueu, Moraña, Valga, Ponteareas, Mondariz, A Estrada, A Guarda, Moaña, O Porriño, Vigo ou Poio, onde tamén está en proxecto outra senda na PO-303 en Samieira.