Lalín (Pontevedra), 3 de setembro de 2026

O conselleiro de Educación, Ciencia, Universidades e FP, Román Rodríguez, reuniuse esta mañá cos directores dos institutos Laxeiro, José Manuel López; e Ramón Mª Aller Ulloa, Juana María Mouriño, para analizar as opcións para seguir impulsando a Formación Profesional no concello. No encontro participou tamén o alcalde de Lalín, José Crespo, así como o equipo técnico.

Os institutos de Lalín contan con algo máis de 320 matriculados en 13 ciclos diferentes. Tal e como destacou o conselleiro, neste momento estase a executar a ampliación do IES Ramón Mª Aller Ulloa, por máis de 3,2 M€, precisamente para dotalo dun novo edificio de 2.164 m² que dará servizo aos ciclos da familia profesional de Informática e comunicacións, na que se centra a oferta do centro. A maiores, realizaranse intervencións puntuais nas edificacións existentes, como a apertura de xanelas e o acondicionamento dun almacén, entre outras. A obra está executada a arredor do 50%.

No caso do IES Laxeiro, acordáronse novas melloras para acondicionar os espazos dedicados a FP. Segundo explicaron os técnicos, as posibilidades de abrir máis zonas vense limitadas pola súa propia situación e falta de espazo na parcela que ocupa. Ademais, a natureza dalgúns dos ciclos que imparten –como os relacionados coa automoción, que precisan de grande maquinaria e equipamentos– esixen que os espazos dedicados a eles estean a nivel de rúa.

Así as cousas, todas as partes acordaron facer unha análise técnica das posibles solucións para, a medio prazo, dotar ao ensino público lalinense de espazos renovados para ampliar a oferta de FP do municipio de ser preciso e dar así máis oportunidades á mocidade. Cómpre lembrar que a matrícula de FP para este curso 2026/27 segue aberta ata o 25 de setembro para os ciclos que teñan aínda teñan prazas libres.

Preto de 7 M€ en Lalín

Cómpre destacar que a Xunta está a investir preto de 7M€ na mellora dos centros educativos de Lalín ao abeiro do Plan de nova arquitectura pedagóxica, posto en marcha en 2021, con actuacións tan salientables como a central de biomasa do Colexio CEIP Xesús Golmar (1,3M€), a rehabilitación integral do CEIP Xoaquín Loriga (661.000 €), ou a renovación de cuberta e fiestras do CEIP Plurilingüe Vicente Arias de la Maza (538.000€) e do CEIP Plurilingüe Varela Buxán (356.000€)

No caso concreto do IES Laxeiro acometéronse obras de reforma da instalación contra incendios, de construción dun novo patio e de cambio de luminarias, entre outras, cun orzamento de arredor de 250.000€. Súmanse á ampliación realizada no centro en 2018, que contou cun investimento de preto de 1 M€. Ademais destas melloras nas súas infraestruturas a Xunta sumou no curso 2023/24 dous novos ciclos de FP Dual Intensiva á oferta do IES Laxeiro.