Ferrol, 3 de setembro de 2026

A delegada da Xunta en Ferrol, Martina Aneiros, xunto a directora territorial da Consellería de Medio Ambiente e Cambio Climático, Pilar Arias, visitou hoxe en Cabo Prior e na praia da Frouxeira (Valdoviño) dous dos paneis informativos do recentemente estreado Camiño do Litoral, unha ruta que, como indicou Aneiros, “chega para contribuír á preservación da costa galega e sumar un novo atractivo de turismo activo á nosa comunidade”.

Este Camiño une todo o litoral galego, desde Ribadeo ata A Guarda e pode percorrerse a pé ou en bicicleta. Supón case 1.400 quilómetros de trazado, divididos en 52 etapas, a través de 78 concellos. A delegada territorial destacou que 10 destas etapas pasan polas comarcas de Ferrolterra e Ortegal, cruzando as costas de Mañón, Ortigueira, Cariño, Cedeira, Valdoviño, Ferrol, Mugardos e Ares.

A representante autonómica destacou que este proxecto “conta ademais cunha gran accesibilidade á información sobre a contorna”. Desta forma, os paneis informativos distribuídos por todo o trazado contan cun código QR para que o usuario poida obter máis datos sobre unha zona concreta ou a ruta en xeral. Ademais, a cidadanía ten ao seu dispor a aplicación móbil Camiño do Litoral  onde está dispoñible información das etapas, dos establecementos turísticos ou dos elementos de interese cultural que hai na contorna.

A Xunta de Galicia, a través da Consellería de Medio Ambiente e Cambio Climático investiu máis de 1,3 M€ para a posta en marcha desta ruta fortemente ligada ao mar. “Somos a comunidade autónoma con máis liña de costa de España e achegamos o 50% dos empregos no sector do mar a nivel estatal, polo que é natural que esta nova ruta naza ao seu carón”, salientou a delegada, que concluíu lembrando que o itinerario tamén busca dinamizar economicamente os municipios costeiros promovendo un turismo sostible e de calidade.