Santiago de Compostela, 17 de setembro de 2026

O Consello de Pesca aprobou, por unanimidade, a proposta técnica promovida pola Consellería do Mar e elaborada por expertos das universidades de Santiago e da Coruña para fixar un sistema específico de protección social para as mariscadoras a pé en situacións de cesamento de actividade. A conselleira do Mar, Marta Villaverde, sinalou que o actual réxime xeral de autónomos non dá resposta ás paradas forzosas por factores ambientais ou baixadas de salinidade como as do pasado inverno.

A iniciativa formula melloras nas coberturas ordinaria e extraordinaria, permite compatibilizar a prestación con labores de rexeneración dos bancos e achega a folla de ruta normativa precisa para que o Goberno central acometa estas mudanzas a través da Seguridade Social e do Instituto Social da Mariña (ISM).

Villaverde presidiu esta tarde a sesión plenaria do Consello Galego de Pesca, a primeira celebrada tras a renovación dos vogais das súas comisións sectoriais. Esta actualización dos órganos de consulta permite axustar a representación do pleno á realidade actual da cadea mar-industria e dinamizar o seu labor de asesoramento nun momento decisivo para o futuro do sector.

Así mesmo, a conselleira informou, polo miúdo, do estado das negociacións do Marco Financeiro Plurianual 2028-2034 e do contido do Consello Consultivo de Política Pesqueira para Asuntos Comunitarios mantido onte en Madrid co ministro Luis Planas. Villaverde detallou que Galicia mantén unha posición firme e unánime na defensa de blindar, na liña do proposto polo Parlamento Europeo, unha contía de, cando menos, 7.290 millóns de euros para a pesca e a acuicultura nun fondo independente, evitando calquera recorte ou dilución en fondos comúns.

Nese marco, defendeu que a nova Política Pesqueira Común (PPC) debe garantir a modernización e renovación da frota envellecida sen que o incremento de habitabilidade e eficiencia compute como esforzo pesqueiro, ademais de asegurar que os criterios de sustentabilidade ambiental vaian sempre a carón da rendibilidade socioeconómica do sector.