Ponteceso (A Coruña), 19 de setembro de 2026

A conselleira de Vivenda e Planificación de Infraestruturas, María Martínez Allegue, destacou hoxe que a nova senda entre Corme Aldea e Corme Porto permitirá seguir avanzando na mellora da seguridade viaria e favorecerá desprazamentos máis seguros, saudables e sostibles para os veciños de Ponteceso.

A conselleira, acompañada pola directora da Axencia Galega de Infraestruturas, María Deza, explicou que a actuación responde a unha demanda trasladada polo Concello e permitirá mellorar a conexión entre Corme Aldea e Corme Porto, “onde se concentran boa parte dos servizos”.

Lembrou que a Xunta xa executou unha senda peonil de 600 metros na AC-424 no Couto, que xa desfrutan a veciñanza e os visitantes, e que naquel momento se anunciara a intención de continuar incrementando os itinerarios seguros nesta estrada. Tamén está a senda de Pazos, froito dun convenio tamén co Concello, xa rematada.

Allegue puxo o acento na complexidade desta actuación, cun investimento superior ao medio millón de euros (563.055 euros) e que conta con cofinanciación dos fondos FEDER, xa que, ademais da execución da senda, se prevé realizar as canalizacións e servizos necesarios, incluíndo un prisma para futuras redes de telecomunicacións. Deste xeito, segundo indicou, “as obras quedan preparadas para o futuro e evítase ter que levantar posteriormente a infraestrutura para executar novos servizos”.

Explicou que a aprobación do proxecto de trazado da actuación se publicará este luns no Diario Oficial de Galicia (DOG) e que os servizos da Consellería están a traballar na supervisión do proxecto construtivo para poder licitar as obras este mesmo ano.

O obxectivo da Xunta é que os traballos poidan comezar o vindeiro ano e que a nova senda, cunha lonxitude aproximada de 900 metros, poida estar executada nun prazo estimado de nove meses.

Allegue puxo en valor a importancia das chamadas “estradas verdes”, que a Xunta está a impulsar ao longo da rede viaria autonómica, tanto para incrementar a seguridade dos usuarios máis vulnerables, especialmente os peóns, como para favorecer hábitos de mobilidade máis saudables.

Neste sentido, subliñou que a creación de sendas permite que os veciños poidan realizar os seus desprazamentos a pé con maior seguridade, reducindo a necesidade de utilizar o vehículo para os traxectos cotiáns.

Allegue fixo fincapé tamén no traballo que a Xunta mantén na conservación e mantemento dunha rede de máis de 5.500 quilómetros de estradas, ao tempo que continúa avanzando na execución de vías de altas prestacións, reforzos de firme e novas sendas peonís.