Madrid, 25 de setembro de 2026

A conselleira de Economía e Industria, María Jesús Lorenzana, solicitou hoxe a Alcoa que poña data e presente canto antes un calendario claro cos prazos en que se vai desenvolver a construción do forno de cocción de ánodos no complexo industrial de San Cibrao.

Lorenzana mantivo hoxe unha xuntanza co director de Operacións de Alcoa en España, Álvaro Dorado, na Oficina Económica de Galicia en Madrid, para tratar a situación actual e futura da factoría da Mariña luguesa.

A conselleira remarcou o carácter “estratéxico” que ten o forno de cocción para que a planta poida seguir funcionando e producindo aluminio, e lembrou que ten outorgado un investimento de 40 millóns de euros do Perte de Descarbonización para cofinanciar a súa construción. Polo tanto, dixo, “a empresa ten que poñerse a traballar nesta infraestrutura canto antes”.

Na xuntanza, tamén estivo sobre a mesa a situación dos parques eólicos de tramitación estatal que subministrarán enerxía ao complexo de San Cibrao, dado que o Goberno segue sen convocar os seus respectivos permisos de acceso e conexión logo de que caducaran. É outra das medidas fundamentais, concluíu, para que os custos enerxéticos non sexan un problema para a súa operatividade futura, ao igual que o estatuto para os consumidores electrointensivos e as subvencións por dereitos de emisións, apuntou.