Valga (Pontevedra), 2 de outubro de 2026

O conselleiro de Emprego, Comercio e Emigración, José González, acompañado pola directora xeral de Formación e Cualificación para o Emprego, Zeltia Lado, visitou hoxe en Valga a empresa de transformación de aluminio Extrugasa, onde salientou a súa aposta pola innovación sen renunciar á tradición, así como a importancia de contar con perfís cualificados a prol do dinamismo do mercado laboral. Nesta liña, referiuse á aposta autonómica para potenciar unha formación flexible, áxil e conectada co tecido produtivo para facer fronte ao reto da cobertura de vacantes.

Unha aposta, especificou, que se enmarca no compromiso da Xunta por ser unha Administración facilitadora e que inclúe apoios para a formación de persoas, tanto ocupadas como desempregadas. Tamén neste ámbito, o Goberno galego avanza no desenvolvemento das microcredenciais cun decreto publicado en xaneiro que se irá implantando progresivamente para permitir ás empresas crear e impartir formación curta e certificada á medida das súas necesidades.

A isto súmase, o modelo autonómico de atracción de talento cun primeiro eixo enfocado no retorno das persoas galegas do exterior, a través de accións como o programa Retorna Cualifica Emprego do que está en vigor a terceira edición e na que se poden inscribir —na web da iniciativa— as persoas e empresas interesadas. Ao abeiro dela, as empresas galegas están ofertando preto de 850 postos de traballo para galegas e galegos do exterior. O segundo eixo céntrase na captación de traballadores de terceiros países.

Benestar laboral

Outro aspecto fundamental, tanto para empresas como persoas traballadoras, ao que fixo referencia o conselleiro foi o benestar laboral. Un fito nesta materia é o plan integral acordado no seo do Diálogo Social e aprobado esta semana polo Consello da Xunta.  Trátase dunha ferramenta pioneira en España dotada 45 M€ e 37 medidas para mellorar o benestar, a xestión das incapacidades temporais por continxencias comúns e impulsar o retorno saudable ao traballo, expuxo. Con ese fin, enfócase en tres eixes, que son o reforzo da prevención e do benestar laboral, melloras na atención sanitaria e o uso responsable do sistema de protección.

En relación co eido do traballo, explicou que reforza o papel do Instituto de Seguridade e Saúde Laboral de Galicia (Issga) e a prevención dos trastornos musculoesqueléticos e da saúde mental. Tamén incorpora apoios para pemes e autónomos, un mecanismo pioneiro de acompañamento á reincorporación e unha Fiestra Única de asesoramento e formación. Ademais, o plan incorpora medidas do ámbito sanitario e un anexo de peticións ao Estado, como un plan de choque para as incapacidades temporais de máis de 365 días, competencia exclusiva do Goberno central.