Culleredo, 7 de outubro de 2026

A Consellería de Educación, Ciencia, Universidades e FP apoia o novo equipamento científico do centro tecnolóxico Cetim, infraestruturas que servirán para a mellora do tecido industrial galego. Así o lembrou a directora da Axencia Galega de Innovación, Carmen Cotelo, que participou esta mañá na xornada A transformación da industria cara á economía circular e a dixitalización, organizada polo centro tecnolóxico Cetim nas súas instalacións en Culleredo. O obxectivo desta xornada é amosar ao tecido industrial galego, especialmente ás pemes, as novas capacidades e equipamentos científicos do centro en materia de reciclaxe, valorización de subprodutos e sustentabilidade industrial, adquiridos co apoio da Xunta de Galicia e o cofinanciamento de fondos europeos do programa Galicia Feder 21-27 a través da liña de fortelecemento de centros tecnolóxicos.

A directora da Axencia destacou o papel dos centros tecnolóxicos como “compañeiros de viaxe” do tecido empresarial e ponte entre o coñecemento e a empresa, especialmente para dar servizo a aquelas pemes que non teñen capacidade para abordar a transformación profunda á que está sometida a industria. Precisamente, un dos obxectivos desta liña de axudas -a través da que se subvencionou este novo equipamento- é reforzar as capacidades dos centros tecnolóxicos para ofrecer ás empresas servizos de experimentación e proba que lles permitan poñer no mercado produtos e servizos innovadores e mellorar a súa competitividade.

Cotelo apuntou que esta xornada cumpre co obxectivo de abrir as infraestruturas dos centros ao tecido empresarial e lembrou que dende 2018 esta liña de axudas ten apoiado 23 proxectos de infraestruturas de centros tecnolóxicos galegos, mobilizando máis de 47 M€ de investimento, cunha achega pública de arredor de 23,6 M€ cofinanciados con fondos Feder.

Novo Centro de Excelencia en Economía Circular

Actualmente, Cetim está a construír unha nova edificación, o Centro de Excelencia en Economía Circular, no Polígono de Morás (Arteixo), cun apoio da Xunta de Galicia de 3,12 M€ a través desta mesma liña de axudas, para acoller as actividades de investigación do centro. Entre outras instalacións, acollerá nove laboratorios, vinculados ás liñas de investigación do centro, así como unha área dedicada a plantas piloto de I+D e outra á almacenaxe necesaria para o desenvolvemento das súas investigacións.

En total, desde 2020 o centro leva recibido preto de 3,9 M€ a través desta liña de axudas para reforzar as súas capacidades en áreas vencelladas á transformación da industria como baterías, augas, hidróxeno verde, polímeros sustentables, materiais de construción sustentable e Industria Sustentable 5.0.