Bos Aires (Arxentina), 8 de outubro de 2026

O secretario xeral da Emigración, Antonio Rodríguez Miranda, celebrou o éxito na Arxentina do programa Conecta con Galicia no Camiño como mostra da ilusión dos galegos do exterior por retornar á súa terra de orixe. Así o dixo no acto de entrega de compostelas ás 39 persoas do país que participaron na iniciativa este ano, no que tamén tomaron parte o comisario do Xacobeo 2027, Marcos Gómez Román, e o delegado da Xunta na Arxentina, Alejandro López Dobarro.

O secretario xeral felicitou as persoas participantes por vivir unha experiencia que une “identidade, historia e futuro”. Así, trátase dun programa destinado a xente nova de orixe galega residente no exterior orientado ao reencontro coas raíces a través do percorrido a pé de máis de 110 km do Camiño de Santiago.

Miranda puxo en valor a “volta a casa” temporal que posibilita este programa e salientouna como unha oportunidade para afianzar os lazos culturais con Galicia nos países onde hai colectividades galegas. Tamén para impulsar a volta á terra e, nese senso, apuntou que preto de 700 galegos na Arxentina retornaron a España en 2024, último ano do que hai rexistros.

Pola súa banda, o comisario do Xacobeo 2027 agradeceu a implicación das persoas participantes e animounas a aproveitar esta experiencia para convertela na mellor promoción do Camiño no seu país, a uns meses dun novo Ano Santo.