Santiago de Compostela, 14 de outubro de 2026

A Consellería do Medio Rural publica hoxe no Diario Oficial de Galicia (DOG) a resolución pola que se amplía a época de perigo alto de incendios forestais durante o ano 2026 nas datas comprendidas entre o 16 e o 31 de outubro. Esta decisión vén motivada polas actuais condicións meteorolóxicas.

Neste sentido, o pasado 11 de xuño publicouse no DOG a orde que determina a época de perigo alto de incendio, que abrangue do 1 de xullo ao 30 de setembro. Esa mesma orde recolle a posibilidade de modificar ditas datas e declarar como perigo alto outras épocas do ano, cando as condicións meteorolóxicas ou outras circunstancias agraven o risco de incendios. Deste xeito, o pasado 24 de setembro publicouse a resolución pola que se ampliou a época de perigo alto de incendios forestais ata o 15 de outubro.

Trala actual ampliación, Galicia continuará en alto risco de incendios ata o 31 de outubro, cun operativo que seguirá moi atento e en garda. A Consellería do Medio Rural lembra tamén que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Asemade, tamén está dispoñible para a súa descarga ALume, a app para avisar sobre incendios forestais activos en Galicia. A maiores, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085.