A directora xeral de Patrimonio natural, Marisol Díaz, preside a xunta reitora do Parque Natural Complexo dunar de Corrubedo e Lagoas de Carregal e Vixán
Ribeira (A Coruña), 17 de novembro de 2026
A directora xeral de Patrimonio Natural, Marisol Díaz, participou hoxe na reunión da xunta reitora do Parque Natural complexo dunar de Corrubedo e lagoas de Carregal e Vixán, na que se abordaron as accións desenvolvidas neste espazo natural en 2026 e as previsións para o próximo ano.
Neste espazo protexido estanse a realizar desde hai tempo distintas accións de conservación da diversidade xeolóxica e biolóxica dos hábitats e das especies. Así o salientou Marisol Díaz esta mañá, que deu conta do labor realizado ao longo do que vai de ano na contorna do parque natural, poñendo como exemplo as actividades divulgativas e lúdicas que se desenvolveron tanto no Centro de visitantes como en colexios da zona e noutros ámbitos de actuación.
A maiores, informouse tamén aos membros da xunta reitora do calendario previsto para o ano 2027 e dos plans e programas en marcha para seguir conservando e investigando a biodiversidade, a paisaxe e o patrimonio natural, prestando unha especial atención ás especies protexidas e ameazadas que alberga o parque de Corrubedo, tales como a píllara das dunas, o sapoconcho común europeo ou a planta iberodes littoralis, ademais de seguir mellorando as instalacións e equipamentos na contorna.