Pontevedra, 26 de xaneiro de 2023 A comisión mixta de seguimento do Protocolo xeral de intencións para a transmisión da titularidade da Finca de Lourizán e da Escola de Cantería por parte da Deputación Provincial de Pontevedra á Comunidade Autónoma de Galicia reuniuse hoxe para avanzar no proceso de cesión. Na xuntanza participaron a directora xeral de Administración Local, Natalia Prieto, e o secretario xeral técnico da Consellería de Cultura, Educación, Formación Profesional e Universidades, Manuel Vila, ademais de asistir o xerente da Axencia Galega da Industria Forestal, da Consellería do Medio Rural, Ángel Bernardo Tahoces.

A colaboración e vontade de diálogo entre ambas as administracións está a permitir o desenvolvemento áxil dos traballos, segundo se puxo de manifesto no encontro, no que se acordou redefinir o calendario das cesións. Así, a previsión é que a transmisión destas titularidades se materialice nun prazo máximo de tres meses fronte aos seis previstos inicialmente.

Cómpre sinalar que no proceso de transferencia da Escola de Cantería se garante a transferencia de todo o persoal mantendo as actuais condicións laborais. Ademais, estase xa elaborando unha proposta formativa de cara ao vindeiro curso, axeitada ás necesidades do sistema produtivo e educativo actual co fin de obter o máximo rendemento das instalacións da escola de cantería e da súa traxectoria. O obxectivo é impulsar as ensinanzas de Formación Profesional na provincia de Pontevedra para darlles resposta ás necesidades de alumnado e empresas.