A Rede Eusumo da Xunta de Galicia, que traballa no impulso da economía social desde hai dez anos, permitiu alumar en 2022 un total de 27 entidades novas neste sector e titorizar 120 proxectos enmarcados nesta fórmula solidaria de negocio, comprometida coa súa contorna, coa que o Goberno galego mantén unha aposta decidida.

Un total de 232 persoas recibiron o ano pasado asesoramento e acompañamento para emprender a súa actividade no marco da economía social. O 60,3% foron mulleres, aspecto que consolida a tendencia nos últimos anos a favor dunha feminización das iniciativas da economía social a través das súas diferentes fórmulas (cooperativas, empresas de inserción, centros especiais de emprego, sociedades laborais...).

No eido da formación, a Xunta de Galicia, a través da Rede Eusumo, formou máis de 1.300 persoas que traballan nas entidades do sector para mellorar a súa competitividade. Impartíronse en 2022 en global 79 cursos en modalidade presencial e en liña sobre contabilidade, internacionalización, marketing dixital, comunicación, ferramentas dixitais innovadoras, etc. Cerca do 70% das alumnas foron mulleres.

A Rede Eusumo naceu hai dez anos con tres obxectivos: fomentar o espírito emprendedor a través da economía social; impulsar o modelo empresarial da economía social no ámbito local; e prestar apoio directo á creación e á consolidación de emprego con base nestas fórmulas de negocio.

Na actualidade, a rede está integrada por 95 entidades socias entre as que se atopan: asociacións de entidades de economía social; administracións públicas (concellos, mancomunidades, deputacións); cámaras de comercio, e organizacións profesionais, empresariais e sindicais; asociacións, fundacións e outras entidades sen ánimo de lucro; cooperativas galegas; asociacións de desenvolvemento rural e grupos de acción local; e universidades.

Acción divulgadora

A través deste instrumento trabállase na divulgación dos valores da economía social entre a poboación e para o emprendemento. No exercicio pasado celebráronse un total de 58 actividades nas que tomaron parte 1.115 participantes, unha vez máis cunha presenza feminina maioritaria.

Para chegar á poboación en xeral, a rede xera recursos e contidos didácticos, informativos e audiovisuais e ten unha ampla presenza nas redes sociais, nas que conta cunha comunidade de máis de 15.600 persoas seguidoras.

A Consellería de Promoción do Emprego e Igualdade fomenta a economía social a través de diversos apoios económicos, dirixidos fundamentalmente á posta en marcha, funcionamento e creación de emprego en cooperativas, sociedades laborais, centros especiais de emprego e empresas de inserción; así como á realización de actividades de promoción e impulso do cooperativismo e da economía social levadas a cabo por entidades colaboradoras da Rede Eusumo.

O Goberno galego seguirá reforzando as políticas autonómicas neste ámbito e os orzamentos de Promoción do Emprego e Igualdade para 2023 incrementan nun 20,87% o investimento para seguir impulsando a economía social, ata chegar aos 42 millóns de euros. No que vai de lexislatura (desde 2020) o crecemento foi do 55,5 %.