Rivo agradece no Uruguai o esforzo e valentía dos emigrantes que levan a marca Galicia por toda América

Manantiales (O Uruguai), 18 de novembro de 2023

A conselleira de Promoción do Emprego e Igualdade, Elena Rivo, acompañada da delegada da Xunta no Uruguai, Elvira Domínguez, e do secretario xeral de Apoio ao Emprego, Traballo Autónomo e Economía Social, Pablo Fernández, participou hoxe en Manantiales na homenaxe, organizada pola Asociación de Empresarios Galegos do Uruguai (AEGU), ao empresario e emigrante galego Jesús Rama, de quen gabou o seu esforzo, valentía e empeño.

Nado en Carballo (A Coruña) é na actualidade un recoñecido empresario e filántropo. Foi dúas veces presidente dos Rotarios do Uruguai e colaborador co Fogar Español de Anciáns.

Rivo agradeceu o traballo dos emigrantes galegos que levan a marca Galicia por toda América e, neste senso, lembrou que Rama foi o primeiro en importar produtos da súa vila, Carballo, ao Uruguai. Tal é o caso dos da conserveira Calvo e, de feito, a familia fundadora desta empresa carballesa desprazouse tamén a Manantiales para asistir á homenaxe a Jesús Rama.

Na actualidade a súa firma ostenta a representación exclusiva no Uruguai de diversas marcas galegas e conta tamén coa súa propia. A conselleira destacou, así, que a emigración galega é exemplo para as novas xeracións que perseguen o soño de emprender e, engadiu, que a Xunta de Galicia apoia e apoiará a toda a emigración e aos seus descendentes. 

Nesa liña, na xornada de hoxe, a conselleira tamén mantivo un encontro con Javier Carballal, fillo dun emigrante de Muras que desde hai case tres anos é alcalde da cidade uruguaia de Punta del Este. De seu pai, precisamente, herdou unha carnizaría que compaxina co seu labor político polo que, en palabras de Rivo, é tamén o perfecto exemplo de galego que persegue o seu porvir, en calquera recuncho do mundo.