A Xunta reanuda mañá o prazo de inscrición nas listas de emprego temporal para traballar nos servizos públicos da administración galega

O prazo, que estaba suspendido polo estado de alarma, rematará o 18 de xullo

Estas listas permiten prestar servizos en escolas infantís, centros de atención a persoas con discapacidade ou en residencias de maiores, entre outros

Ademais, o feito de estar inscrito é unha forma de acadar méritos á hora de participar nun proceso selectivo

Santiago de Compostela, 31 de maio de 2020

A Xunta de Galicia reanuda mañá o prazo de inscrición nas listas de emprego temporal para traballar nos servizos públicos da Administración galega. Este prazo comezará mañá, luns 1 de xuño, e rematará o vindeiro 18 de xullo.

O prazo para a presentación de solicitudes de inclusión nas listas de contratación temporal da Xunta atopábase suspendido a causa da declaración do estado de alarma para a xestión da crise sanitaria ocasionada pola covid-19. Agora, este prazo amplíase ata un mes e 18 días naturais.

Así, o persoal interesado que cumpra os requisitos de titulación poderá continuar coas solicitudes de inclusión nas bolsas de emprego temporal que se atopaban abertas antes da declaración do estado de alarma, para o nomeamento de funcionarios interinos e a contratación de persoal laboral temporal da Administración galega.

Estas listas son utilizadas pola Xunta para cubrir vacantes, facer substitucións e reforzar os servizos públicos. As persoas contratadas prestarán servizos en escolas infantís, centros de atención a menores ou persoas con discapacidade, residencias de maiores, centros para persoas con dependencia, nos servizos de gardacostas ou en institutos politécnicos.

É importante subliñar que o feito de estar inscrito nestas listas de emprego temporal para realizar substitucións temporais é unha forma de acadar méritos á hora de participar nun proceso selectivo e, polo tanto, incrementa as posibilidades de lograr un posto de traballo fixo na Administración.

Todas aquelas persoas interesadas en apuntarse nestas listas de emprego temporal poderán realizar a inscrición a través da web da Xunta de Galicia, no apartado ‘Listas de Contratación’. As persoas que xa formaban parte desta bolsa non é preciso que se anoten de novo.

Imaxes relacionadas
Data de actualización: 31/05/2020