Examinada a solicitude de deslindamento formulada polos representantes de montes veciñais en man común (MVMC) Monte Medo de Vilardecás, pertencente á Comunidade de Montes Vecinales en Man Común (CMVMC) de Vilardecás e Lamelas, e o MVMC Medo de Tioira, pertencente á CMVMC de Tioira e O Batán, no concello de Maceda, resultan os seguintes

Feitos:

Primeiro. O 30.1.2024, a CMVMC de Vilardecás e Lamelas presentou un escrito (Rexel 2024/278613) en que solicita a aprobación dun deslindamento coa CMVMC de Tioira e O Batán.

Coa solicitude achegou a seguinte documentación:

– Acta de deslindamento.

– Acta de conciliación levantada no Xulgado de Paz de Maceda.

– Certificacións dos acordos das respectivas asembleas xerais.

– Levantamento topográfico.

Segundo. O informe do Servizo de Montes do Departamento Territorial de Ourense, do 14 de febreiro de 2024, fai constar que a documentación achegada corresponde ao deslindamento do perímetro estremeiro entre o MVMC Monte Medo de Vilardecás, pertencente á CMVMC de Vilardecás e Lamelas, e o MVMC Medo de Tioira, pertencente á CMVMC de Tioira e O Batán, desde o vértice 1, Torgas (o situado máis ao S), ata o vértice 4, Cruz Vella (o situado máis ao N).

Logo de analizar os vértices e a súa localización obsérvase que:

• No punto inicial da liña (vértice 1, Torgas) conflúe tamén o MVMC do Medo, pertencente á CMVMC de Baños de Molgas, Francos, Froufe, A Lama e Vide, comunidade que non participa na conciliación.

Porén, o punto en cuestión sitúase sobe a representación cartográfica dese monte que consta no Rexistro de MVMC, de xeito que a inclusión dese vértice na conciliación non implica afectación real sobre a propiedade dos veciños de Baños de Molgas.

• Pola súa parte, no punto final do deslindamento conflúe tamén o MVMC Monte Medo de Carguizoi, comunidade que tampouco participa na conciliación.

En consecuencia, a aceptación do punto en cuestión non supón a modificación da representación cartográfica do monte dos veciños de Carguizoi, senón que a liña perimetral de Vilardecás deberá conectar o dito vértice coa representación do punto Cruz Vella que consta actualmente na base cartográfica do Rexistro de MVMC.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeiro. Esta resolución dítase ao abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segundo. O artigo 53 da Lei 7/2012, do 28 de xuño, de montes de Galicia, recolle o procedemento que se debe seguir no deslindamento entre montes veciñais en man común e establece que o Xurado Provincial de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 14 de febreiro de 2024, o Xurado Provincial de Montes Veciñais en Man Común acordou por unanimidade, o día 4 de novembro de 2024:

Aprobar o acto de conciliación acadado polas xuntas reitoras dos MVMC Monte Medo de Vilardecás, pertencente á CMVMC de Vilardecás e Lamelas, e o MVMC Medo de Tioira, pertencente á CMVMC de Tioira e O Batán, no concello de Maceda.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso- administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, de 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 27 de novembro de 2024

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense