Para os efectos previstos no artigo 53 da Lei 7/2012, do 28 de xuño, de montes de Galicia, dáse publicidade ao acordo adoptado polo Xurado Provincial de Clasificación de Montes Veciñais en Man Común de Pontevedra, o 27 de novembro de 2024, en relación co deslindamento parcial entre as comunidades de montes veciñais en man común de Borela e Aguasantas (concello de Cotobade), ao respecto da estrema común dos seus montes (expediente DC22031).

Feitos:

Primeiro. O 27.9.2022, o presidente da comunidade de montes veciñais en man común (en diante, CMVMC) de Borela presenta no rexistro electrónico da Xunta de Galicia co núm. de entrada 2022/2363113 solicitude de deslindamento entre a CMVMC de Borela e a CMVMC de Aguasantas no concello de Cotobade.

Os montes veciñais en man común (en diante, MVMC) afectados por este deslindamento son:

– MVMC de Borela (ID Monte: 2584) da CMVMC de Borela.

– MVMC de Aguasantas (ID Monte: 2582) da CMVMC de Aguasantas.

Segundo. Consta no expediente a seguinte documentación do deslindamento consonte o artigo 53 da Lei 7/2012:

• Acta do deslindamento o 7.9.2022.

• Acta de conciliación entre as comunidades no Xulgado de Paz de Cotobade o 23.9.2022.

• Certificado do secretario da CMVMC de Aguasantas coa conformidade do presidente do 16.5.2024 da aprobación na asemblea do 23.7.2022.

• Certificado do secretario da CMVMC de Borela coa conformidade do presidente do 15.9.2022 da aprobación na asemblea do 22.5.2022.

• Memoria descritiva co plano de deslindamento e cartografía en formato dixital no datum ETRS89/UTM zona 29N EPSG: 25829. Asinado o 26.9.2022 pola enxeñeiro técnico forestal colexiada núm. 757 do COETF de Galicia. As emendas realizadas producen a súa modificación.

• Informe de validación gráfica catastral CSV: Z0EPRGFSYC3B4NMJ (para a comunicación da alteración catastral consonte o artigo 55.3 da Lei 7/2012), que polo principio de colaboración entre administracións deberá verificar a Xerencia Territorial de Catastro.

Terceiro. A liña de deslindamento proposta ten unha lonxitude de 2.086 metros e está composta polos seguintes puntos:

Punto 1: x: 542.167,68 y: 4.699.221,37

Punto 2: x: 542.296,73 y: 4.698.792,77

Punto 4: x: 541.610,45 y: 4.697.207,20

Inicialmente proponse o punto 3 (x: 541.519,07 y: 4.697.686,61), o punto 5 (x: 541.617,07 y: 4.697.185,65) e o punto 12A´ (x: 541612,56 y: 4697202,53), pero logo de consultar o expediente de revisión de esbozo da CMVMC de Aguasantas (RE22067) non queda xustificada a colindancia, polo tanto, estes puntos non forman parte do deslindamento.

No traballo de gabinete establécense oito puntos de deslindamento secundarios, dous respectan o dominio público da estrada (punto 13A´ e punto 14A´), polo que nestes tramos non existe colindancia entre ambos os montes (o deslindamento realizarase coa Administración competente). Catro puntos respectan as propiedades particulares (punto 6A´, punto 7A´, punto 8A´, punto 9A´ e punto 10A´), polo que nestes tramos non existe colindancia entre ambos os montes (o deslindamento realizarase coas propiedades particulares). E un punto 11A´ establécese como punto intermedio na traxectoria da liña de deslindamento.

Punto 6A´: x: 542.270,25 y: 4.698.880,72

Punto 7A´: x: 541.657,69 y: 4.697.698,77

Punto 8A´: x: 541.635,86 y: 4.697.489,45

Punto 9A´: x: 541.647,23 y: 4.697.460,45

Punto 10A´: x: 541.647,23 y: 4.697.428,83

Punto 11A´: x: 541.626,16 y: 4.697.371,31

Punto 13A´: x: 542.248,28 y: 4.698.953,79

Punto 14A´: x: 542.249,81 y: 4.698.948,28

Revisada a cartografía das resolucións de clasificación de ambos os MVMC detéctase que existe colindancia entre ambas.

O deslindamento está formado por cinco tramos:

Tramo 1: punto 1-punto 13A´

Tramo 2: punto 14A´-punto 6A´

Tramo 3: punto 2-punto 7A´

Tramo 4: punto 8A´-punto 9A´

Tramo 5: punto 10A´-punto 4

A liña de deslindamento establécese tomando de referencia o Rego Miniños. Considérase que ambos os montes son colindantes cartograficamente e topograficamente ao tratarse dun rego de pequenas dimensións (ambas as comunidades deben de respectar o dominio público hidráulico).

A liña do deslindamento respecta a liña do Instituto Xeográfico Nacional entre os concellos de Cerdedo-Cotobade e Ponte Caldelas.

A liña do deslindamento produce modificacións na cartografía dos esbozos de clasificación. A CMVMC de Aguasantas presenta RE22067 e a CMVMC de Borela realiza un axuste para que o deslindamento sexa coincidente no punto inicial e final coa planimetría existente.

O Servizo de Montes considera que a solicitude se axusta ao establecido no artigo 53, polo que propón a aprobación do deslindamento segundo a liña presentada.

Consideracións legais e técnicas:

Primeira. Esta resolución dítase de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que hai que seguir no deslindamento entre montes veciñais en man común e establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e consideracións legais e técnicas expostos, o Xurado por unanimidade dos seus membros,

ACORDA:

Aprobar o deslindamento parcial realizado entre a CMVMC de Borela e a CMVMC de Aguasantas (Cotobade) respecto da súa estrema común nos termos indicados no feito terceiro.

Contra esta resolución, que pon fin á vía administrativa, poderase interpoñer recurso de reposición con carácter potestativo perante o Xurado Provincial de Clasificación de Montes Veciñais en Man Común de Pontevedra no prazo dun mes, ou ben interpoñer directamente recurso contencioso-administrativo perante o Xulgado do Contencioso-Administrativo de Pontevedra no prazo de dous meses contados desde o día seguinte ao da presente notificación, de acordo co disposto no artigo 123 e 124 Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Pontevedra, 13 de decembro de 2024

Antonio Crespo Iglesias
Presidente do Xurado Provincial de Clasificación
de Montes Veciñais en Man Común de Pontevedra