Examinada a solicitude de deslindamento formulada polos representantes do MVMC Portela de Mirós, pertencente á CMVMC de Mirós, e o MVMC de Trepa, pertencente á CMVMC da Trepa, no concello de Riós, resultan os seguintes

Feitos:

Primeiro. O 30.4.2024, a CMVMC de Mirós presentou un escrito (Rexel 2024/1463515), no cal solicitan a aprobación dun deslindamento coa CMVMC da Trepa. Coa solicitude achegaban a seguinte documentación:

– Acta de deslindamento.

– Acta de conciliación levantada no Xulgado de Paz de Riós.

– Certificacións dos acordos das respectivas asembleas xerais.

– Informe de deslindamento.

Segundo. O informe do Servizo de Montes do Departamento Territorial de Ourense do 10 de xuño de 2024 fai constar que a documentación achegada corresponde ao deslindamento do perímetro estremeiro entre o MVMC Portela de Mirós, pertencente á CMVMC de Mirós, e o MVMC de Trepa, pertencente á CMVMC da Trepa, desde o vértice 1 (o situado máis ao O) ata o vértice 8 (o situado máis ao L).

Logo de analizar os vértices e a súa localización obsérvase que:

– No punto inicial da liña conflúe tamén, conforme o indicado na memoria do deslindamento e máis no antecedente 4, o MVMC de Feilas; xa que logo, e tendo en conta que a comunidade propietaria deste último non participa da avinza, cabe concluír que a conciliación comeza realmente no vértice 2, tendo o vértice 1 a condición de punto auxiliar que permite determinar a dirección da liña no seu tramo inicial.

– A liña avinzada correspóndese integramente coa marxe S dun tramo de cortalumes. Neste sentido, cómpre aclarar que a liña non se corresponde exactamente cos segmentos rectos que unen os puntos conciliados, senón que se axusta a un tramo de aresta do recinto c da R.C. 32072A20800308, correspondendo o dito recinto ás áreas cortalumes presentes dentro desa parcela catastral.

O citado informe considera que a solicitude se axusta ao establecido no artigo 53 da Lei 7/2012, do 28 de xuño, de montes de Galicia, polo que propón ao Xurado Provincial a súa aprobación.

Consideracións legais e técnicas:

Primeira. A presente resolución dítase o abeiro do artigo 53 do Regulamento para a execución da Lei 13/1989, do 10 de outubro, de montes veciñais en man común, aprobado polo Decreto 260/1992, do 4 de setembro, e de conformidade co disposto na Lei 39/2015, do 1 de outubro, do procedemento administrativo común das administracións públicas.

Segunda. O artigo 53 da Lei 7/2012, do 28 de xuño, de montes de Galicia, recolle o procedemento que se seguirá no deslindamento entre montes veciñais en man común e establece que o xurado provincial de montes veciñais en man común, logo do exame da documentación presentada, ditará resolución que será publicada no Diario Oficial de Galicia e notificada ás comunidades interesadas.

De acordo cos feitos e fundamentos de dereito expostos, e tendo en conta o informe favorable do Servizo de Montes do día 10 de xuño de 2024, o Xurado Provincial de Clasificación de Montes Veciñais en Man Común acordou por unanimidade o día 16 de decembro de 2024:

Aprobar o acto de conciliación acadado polas xuntas reitoras do MVMC Portela de Mirós, pertencente á CMVMC de Mirós, e o MVMC de Trepa, pertencente á CMVMC da Trepa, no concello de Riós.

Contra esta resolución, que pon fin á vía administrativa, poderase interpoñer recurso potestativo de reposición perante o Xurado Provincial de Clasificación de Montes Veciñais en Man Común de Ourense no prazo dun mes, ou ben directamente recurso contencioso-administrativo perante o Xulgado do Contencioso-Administrativo de Ourense, no prazo de dous meses contados desde o día seguinte ao desta notificación, de acordo co disposto nos artigos 123 e 124 da Lei 39/2015, do 1 de outubro, do procedemento administrativo común das administracións públicas, e nos artigos 8 e 46 da Lei 29/1998, do 13 de xullo, reguladora da xurisdición contencioso-administrativa.

Ourense, 15 de xaneiro de 2025

José Antonio Armada Pérez
Presidente do Xurado Provincial de Clasificación
de Montes Veciñais en Man Común de Ourense