Expediente: IN407A 2024/102-1.

Promotor: UFD Distribución Electricidad, S.A.

Instalación: LMT, CTC e RBTS O Castriño.

Concello: Rianxo.

Feitos:

1. O día 22 de marzo de 2024, a empresa promotora solicitou a autorización administrativa previa, a autorización administrativa de construción e a declaración de utilidade pública do proxecto de execución da dita instalación de distribución eléctrica, co fin de mellorar a calidade da subministración eléctrica no lugar do Castriño.

Achegan o proxecto, que inclúe memoria, planos e orzamento xunto coa relación de bens e dereitos afectados de necesaria ocupación para a construción da liña, ao abeiro dos artigos 123 e 143 do Real decreto 1955/2000, e que abrangue os seguintes documentos:

– Proxecto de execución nomeado: LMT, CTC e RBTS O Castriño (Rianxo), asinado o 19 de febreiro de 2024 por Antonio Javier Sabín Vázquez, enxeñeiro técnico industrial eléctrico, con número de colexiado 2.233.

2. O proxecto someteuse ao trámite de información pública mediante un Acordo do 12 de xullo de 2024, publicado nos seguintes medios:

– Portal de transparencia e Goberno aberto da Consellería de Economía e Industria.

– DOG: 12 de agosto de 2024, co número 155.

– BOP: 24 de xullo de 2024, co número 142.

– Xornal La Voz de Galicia: 26 de xullo de 2024.

– Taboleiro de anuncios do Concello: solicitouse a certificación municipal de exposición pública ao Concello de Rianxo o 12 de xullo de 2024 e, feita a reiteración a este organismo o 2 de outubro de 2024, non se tivo resposta do dito concello na data desta resolución.

3. Durante o período en que se someteu o proxecto ao trámite de información pública non se presentou ningunha alegación, reclamación ou suxestión relacionada coa documentación obxecto de publicación.

4. Consonte o artigo 127 do Real decreto 1955/2000, do 1 de decembro, déuselles traslado ás distintas administracións, organismos ou, de ser o caso, empresas de servizo público ou de servizos de interese xeral afectadas dunha separata do proxecto, na parte en que a instalación poida prexudicar bens e dereitos ao seu cargo, que contén as características da instalación e a documentación cartográfica correspondente. Solicitóuselles o preceptivo informe a Augas de Galicia (Zona Hidrográfica Galicia Norte), Departamento Territorial da Consellería de Medio Ambiente e Cambio Climático da Coruña; ao Servizo do Patrimonio Cultural, Departamento Territorial da Consellería de Cultura, Lingua e Xuventude da Coruña, e ao Concello de Rianxo. A empresa promotora manifestou a súa conformidade cos condicionados establecidos polos organismos afectados.

5. O día 5 de febreiro de 2025 emitiuse o informe técnico.

Consideracións legais e técnicas:

1. O director territorial é competente para resolver este expediente segundo o Decreto 9/2017, do 12 de xaneiro, polo que se establecen os órganos competentes para a resolución dos procedementos de autorización de instalacións eléctricas que sexan competencia da Comunidade Autónoma de Galicia (DOG núm. 22, do 1.2.2017) e no Decreto 140/2024, do 20 de maio, polo que se establece a estrutura orgánica da Consellería de Economía e Industria (DOG núm. 101, do 27.5.2024).

2. Lexislación de aplicación:

– Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro).

– Lei 40/2015, do 1 de outubro, de réxime xurídico do sector público (BOE núm. 236, do 2 de outubro).

– Lei 24/2013, do 26 de decembro, do sector eléctrico (BOE núm. 310, do 27 de decembro).

– Real decreto 1955/2000, do 1 de decembro, polo que se regulan as actividades de transporte, distribución, comercialización, subministración e procedementos de autorización de instalacións de enerxía eléctrica (BOE núm. 310, do 27 de decembro).

– Real decreto 223/2008, do 15 de febreiro, polo que se aproban o Regulamento sobre condicións técnicas e garantías de seguridade en instalación eléctricas de alta tensión e as súas instrucións técnicas complementarias ITC-LAT 01 a 09 (BOE núm. 68, do 19 de marzo).

– Real decreto 337/2014, do 9 de maio, polo que se aproban o Regulamento sobre condicións técnicas e garantías de seguridade en instalacións eléctricas de alta tensión e as súas instrucións técnicas complementarias ITC-RAT 01 a 23 (BOE núm. 139, do 9 de xuño).

– Real decreto 842/2002, do 2 de agosto, polo que se aproba o Regulamento electrotécnico para baixa tensión (BOE núm. 224, do 18 de setembro).

– Real decreto 2563/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de industria, enerxía e minas (BOE núm. 246, do 14 de outubro).

– Lei do 16 de decembro de 1954, sobre expropiación forzosa (BOE núm. 351, do 17 de decembro).

– Decreto do 26 de abril de 1957 polo que se aproba o Regulamento da Lei de expropiación forzosa (BOE núm. 160, do 20 de xuño).

3. Características técnicas:

As instalacións de alta tensión obxecto deste expediente están no lugar do Castriño, parroquia de Taragoña (San Salvador), no concello de Rianxo.

– Novo centro de transformador de tipo prefabricado rural de 100 kVA, manobra exterior con envolvente de formigón, con acceso desde vía pública.

– Para a execución do entroncamento coa liña LMTA BOI808, substitúese o apoio nº 52 existente de tipo HV S-AL 13/400B1-CS por un novo apoio de celosía metálica de tipo C 16/2000-H35-CA, con interruptor-seccionador TC. O cantón de liña existente que se reforma ten a súa orixe no apoio nº 49 e finaliza no apoio nº 53 da LMTA BOI808, e a lonxitude deste tramo de liña que se retensa é de 494 metros.

– O novo centro de transformacion aliméntase mediante un novo tramo de liña de media tensión subterránea en condutor de tipo RHZ1-2 OL-12/20 kV 3 (1×150) mm² Al, canalizado en gabia de dimensións de 0,40 metros de ancho e entre 1,00 e 1,40 m de profundidade, aloxado en tubo de polipropileno de 160 mm de diámetro, e instálanse tubos de reserva. O tramo de liña ten o seu inicio no paso de aéreo a soterrado que se vai realizar no novo apoio nº 52 de tipo C-16/2000-H35-CA da LMTA, en que se instalan pararraios autoválvulas de 24 kV/10 kA e un Interruptor-seccionador TC, finalizando no novo centro de transformación. A lonxitude total da LMTS é de 548 metros.

4. No expediente consta un informe favorable dos servizos técnicos deste departamento territorial.

Consonte con todo o sinalado,

RESOLVO:

1. Conceder a autorización administrativa previa, a autorización administrativa de construción e a declaración de utilidade pública da dita instalación de distribución eléctrica.

A declaración de utilidade pública leva implícita a necesidade de ocupación dos bens e de adquisición dos dereitos afectados e implicará a urxente ocupación, para os efectos do artigo 52 da Lei de expropiación forzosa.

2. A instalación executarase no prazo dous anos, contados a partir do día seguinte ao da publicación desta resolución no Diario Oficial de Galicia. En todo caso, deberán respectarse os prazos establecidos no artigo 13.9 do Regulamento (UE) 2024/573 do Parlamento Europeo e do Consello, do 7 de febreiro de 2024, sobre os gases fluorados de efecto invernadoiro, polo que se modifica a Directiva (UE) 2019/1937 e se derroga o Regulamento (UE) nº 517/2014 (DOUE núm. 573, do 20 de febreiro), sobre prohibicións para a posta en funcionamento de aparellaxe eléctrica que empregue gases fluorados de efecto invernadoiro, ou cuxo funcionamento dependa deles, nun medio illante ou de rotura.

3. Para a posta en funcionamento da instalación autorizada, deberá achegar ante este departamento territorial unha solicitude á cal xuntará a seguinte documentación:

– As declaracións de conformidade relativas ao material ou equipamento e as certificacións ou homologacións, se procede.

– Un certificado do/da director/a da montaxe en que se garantirá o cumprimento das especificacións do proxecto e das prescricións complementarias, se as houber, así como das regulamentacións e normas axeitadas para a montaxe da instalación e posta a punto.

– Planimetría as built da instalación eléctrica en formato shape.

4. Esta autorización outórgase sen prexuízo doutras que sexan de aplicación segundo a lexislación vixente, en especial no relativo á ordenación do territorio e ao ambiente.

O incumprimento das condicións e requisitos establecidos nesta resolución ou a variación substancial dos presupostos que determinaron o seu outorgamento poderán dar lugar á súa revogación, logo de audiencia ao interesado, segundo o establecido no artigo 53.10 da Lei 24/2013, do 26 de decembro, do sector eléctrico.

Contra esta resolución, que non é definitiva en vía administrativa, poderá interporse recurso de alzada perante a conselleira de Economía e Industria, no prazo dun mes contado a partir do día seguinte ao da notificación ou publicación, segundo o disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), sen prexuízo de que as persoas interesadas poidan interpor calquera outro recurso que consideren axeitado.

Mediante este documento notifícaselles aos interesados esta resolución, segundo o exixido no artigo 40.1 da Lei 39/2015.

A Coruña, 12 de febreiro de 2025

Isidoro Martínez Arca
Director territorial da Coruña

ANEXO

Expediente: IN407A 2024/102-1.

LMT, CTC e RBTS O Castriño.

Relación de bens e dereitos afectados-concello de Rianxo.

Predio proxecto	Persoa propietaria/titular	Referencia catastral	Lugar	Afección de solo pleno dominio		Afección de solo por servidume de paso de enerxía eléctrica				Natureza do terreo
				Apoio núm.	Superficie (m²)	ml. aér.	ml. sot.	m² aér.	m² sot.
1	José Fulgencio Nine	15073A066003880000FB	Agro do Muíño	52	2.0		3.0		8.0	Prado
2	Descoñecida/o	4545018NH1244N0001FY	Rúa Castriño, 4	Centro de transformación	35.0		5.0		14.0	Labor

Abreviacións:

ml aér.: lonxitude da servidume aérea en metros lineais.

ml sot.: lonxitude da servidume soterrada en metros lineais.

m² aér.: superficie de servidume aérea en m².

m² sot.: superficie de servidume soterrada en m².