A Axencia Tributaria de Galicia (en diante, Atriga), desde a súa entrada en funcionamento o 1 de xaneiro de 2013, ten encomendada a función de aplicar os tributos como instrumento ao servizo dos intereses da Comunidade Autónoma de Galicia para a aplicación efectiva dos recursos ao seu cargo.

A Atriga ten entre os seus obxectivos fomentar o cumprimento voluntario das obrigacións fiscais mediante accións de concienciación e sensibilización, prestando servizos de información e asistencia que minimicen os custos indirectos dos contribuíntes, garantindo que se cumpra o principio constitucional de sostemento dos gastos públicos de acordo coa capacidade económica de cada individuo, mediante actuacións de control e de colaboración con outras administracións públicas dirixidas á detección e regularización dos incumprimentos tributarios.

O artigo 116 da Lei 58/2003, do 17 de decembro, xeral tributaria (en diante, LXT), establece a obrigación de elaborar anualmente un plan de control tributario, con carácter reservado, sen prexuízo da publicidade, a través do Diario Oficial de Galicia, dos criterios xerais que o informan.

Pola súa parte, o artigo 170 do Regulamento xeral das actuacións e os procedementos de xestión e inspección tributaria e de desenvolvemento das normas comúns dos procedementos de aplicación dos tributos, aprobado polo Real decreto 1065/2007, do 27 de xullo, sinala que no Plan de control tributario se integrarán o plan ou os plans parciais de inspección, os cales terán carácter reservado e non serán obxecto de publicidade ou comunicación.

O obxectivo do Plan de control tributario céntrase en acadar na práctica os principios de xustiza, xeneralidade, igualdade e capacidade económica, establecidos polo artigo 31 da Constitución española como criterios de contribución ao sostemento dos gastos públicos. Como sinalou a xurisprudencia reiteradamente, non abonda con configurar as normas dos distintos tributos de acordo cos principios constitucionais citados, senón que estes principios teñen que cumprirse na práctica cunha correcta aplicación das distintas figuras tributarias.

Desta forma, o Plan de control tributario convértese nun instrumento fundamental para acadar unha efectiva aplicación dos principios expostos, xa que marca as liñas de actuación da Administración tributaria, tendo en conta a dispoñibilidade de medios materiais e persoais para realizar estas funcións. Reflíctense neste plan as liñas de actuación que se consideran máis relevantes consolidando, por unha banda, as actuacións realizadas en anos anteriores e incorporando, por outra, novas actuacións motivadas tanto polos cambios normativos que acontecen cada ano como polo avance nos medios tecnolóxicos de que dispón a Administración tributaria.

O estatuto da Atriga, aprobado polo Decreto 202/2012, do 18 de outubro, establece no artigo 16.2.j) que corresponde á Dirección da Atriga aprobar o Plan de control tributario anual. En cumprimento das obrigacións establecidas nestas disposicións, publícanse os criterios e as liñas de actuación que o informan.

En consecuencia,

RESOLVO:

Primeiro. Aprobar as directrices xerais do Plan xeral de control tributario de 2025

Apróbanse os criterios xerais que informan o Plan xeral de control tributario de 2025 que figuran no anexo a esta resolución.

Segundo. Difundir as directrices xerais do Plan xeral de control tributario de 2025

Ordénase a publicación destas directrices xerais no Diario Oficial de Galicia, así como a súa difusión por calquera medio que resulte adecuado para o seu xeral coñecemento.

Santiago de Compostela, 3 de abril de 2025

Sonia Lafont Sendino
Directora da Axencia Tributaria de Galicia

ANEXO

Directrices do Plan xeral de control tributario de 2025

O Plan de control tributario da Atriga para o ano 2025 está composto polas directrices xerais de actuación e os plans de xestión tributaria, inspección tributaria e recadación que, conforme co disposto no artigo 116 da LXT, teñen carácter reservado, e establécense en cada un deles as liñas de actuación que se van executar e os obxectivos para alcanzar.

O Plan xeral de control tributario desenvolverase distinguindo entre actuacións de control preventivo, que incluirán fundamentalmente as de información e de asistencia aos obrigados tributarios, e as de colaboración social, actuacións de control posterior e actuacións de xestión recadadora.

No exercicio desas actuacións terá atención prioritaria a calidade da información como ferramenta de control, o que exixe a evolución, a continua mellora e a ampliación das ferramentas e aplicacións informáticas propias da Axencia, de forma que permita realizar o control do cumprimento tributario de maneira máis eficaz e eficiente. Neste sentido, as actuacións centraranse en dous eixes: por unha banda, seguirase traballando en aumentar as fontes de información, tanto incorporando novas fontes como mellorando as xa existentes e poñendo énfase especial na información que poida ter relevancia tributaria e que estea dispoñible na internet e nas diferentes redes sociais; doutra banda, esta información unificada ten que ser obxecto dunha análise detallada, empregando as modernas técnicas existentes de tratamento da información para detectar áreas de risco fiscal, utilizando para iso a análise por sectores económicos, por zonas territoriais ou por comportamentos subxectivos.

En liña co avance na intelixencia artificial que debe estar presente en toda Administración moderna tecnoloxicamente, durante o ano 2025 continuarase na liña de desenvolver ferramentas específicas de simplificación de procesos que permitirán realizar de maneira áxil os procedementos tributarios máis sinxelos. Con estas ferramentas proseguirase na senda de reducir os tempos de resposta achegando cada vez máis os tempos de actuación ao momento da devindicación dos impostos e de detectar os incumprimentos dunha forma máis precisa e, por tanto, lograr un uso máis eficiente dos recursos da Axencia Tributaria, así como reforzar os dereitos e garantías dos contribuíntes.

Deste xeito, con este plan dáse cumprimento á obrigación legal de establecer unha planificación anual das actuacións que deben levar a cabo as administracións tributarias.

En consecuencia, as directrices do Plan anual de control tributario estrutúranse nos seguintes ámbitos:

1. Control preventivo.

1.1. Información e asistencia aos obrigados tributarios.

As actuacións de información e asistencia teñen como finalidade lograr o cumprimento espontáneo das obrigacións fiscais mediante a redución das cargas administrativas a que debe facer fronte a cidadanía e fomentar o cumprimento voluntario e adecuado das obrigacións fiscais para contribuír á seguridade xurídica e a previr o seu incumprimento.

De acordo co anterior, está claro que as novas tecnoloxías aplicadas aos procedementos xestores de tributos son un instrumento idóneo para conxugar os principios de eficacia da Administración tributaria e a limitación dos custos indirectos ao contribuínte, e, nesta liña, a presentación electrónica de tributos ofrécelle a posibilidade de evitar desprazamentos ás oficinas xestoras ou ás entidades bancarias para a realización do pagamento, así como a presentación dos tributos fóra do horario normal de atención ao público. Así mesmo, a utilización dos programas que a Administración tributaria establece para a presentación electrónica dos tributos facilita cubrir os modelos, guiando o contribuínte na introdución dos datos, evitando a reiteración destes e ofrecéndolle unha axuda en liña.

Coa incorporación das novas tecnoloxías preténdese esencialmente acadar unha Administración que cumpra os obxectivos dun maior achegamento á cidadanía, facilitándolle o acceso á información e aos seus servizos, un maior coñecemento por parte da cidadanía da Administración, das súas funcións e as súas competencias, unha maior axilización na tramitación de asuntos, así como unha redución do tempo de resposta, que redunde nunha mellora da calidade e eficiencia do servizo ofrecido.

O desenvolvemento da normativa básica estatal en materia de administración electrónica levouse a cabo coa Lei 4/2019, do 17 de xullo, de administración dixital de Galicia, que regula o modelo de administración dixital no sector público autonómico. Estes cambios normativos que tiveron lugar implicaron a obrigación recíproca de determinadas persoas a relacionarse a través de medios electrónicos coas administracións públicas. Isto, unido á necesidade de avanzar na axilización dos trámites que debe realizar o colectivo dos colaboradores sociais a que se refiren os artigos 92 a 95 da LXT, deu lugar a que, desde febreiro de 2021, se obrigase a todos eles a utilizaren medios electrónicos para realizaren a presentación e o pagamento dos modelos de autoliquidacións do ITP-AXD e do ISD, coa finalidade última da prestación de servizos públicos dixitais de calidade no marco dunha Administración pública que evolucione xunto coa sociedade, ao aproveitar as innovacións das tecnoloxías dixitais para construír un novo modelo de Administración máis transparente, sinxelo e eficaz, inclusivo e sustentable. Todo iso en liña co proceso de modernización en que desde hai tempo está inmersa a Administración autonómica á hora de desenvolver un contexto electrónico sen papel en todos os procedementos administrativos, co efecto positivo que implica nas políticas ambientais.

Para este fin, continuarase mellorando tanto a información existente na páxina web da Atriga como os programas de axuda para a confección de autoliquidacións e xestión de trámites existentes na súa oficina virtual tributaria (OVT) ao dotala con novas funcionalidades e ao profundar nas seguintes actuacións:

1.1.1. Emprego de medios electrónicos, informáticos e telemáticos.

Levaranse a cabo as seguintes medidas:

– Unha vez posta en marcha a nova web da Atriga, seguirase a traballar na consolidación do modelo de información e asistencia para dar resposta inmediata ás demandas de información máis habituais. Para tal efecto, ofreceranse na web da Axencia novos contidos e desenvolveranse ferramentas e servizos específicos para o contribuínte, como asistentes virtuais. Ademais, publicarase o catálogo de servizos de asistencia que, dunha maneira sinxela e visual, permite á cidadanía coñecer os diferentes servizos de información e asistencia que ofrece a Axencia Tributaria e as distintas canles de acceso.

– Complementarase o actual modelo de información e asistencia cun sistema de atención a través de videoasistencia, acompañada, nos casos necesarios, dun sistema de axuda remota para cubrir e presentar as autoliquidacións e a documentación complementaria, o que redundará nunha atención máis personalizada, eficiente e rápida. Deste xeito, aquelas persoas con máis dificultades de manexo dos sistemas informáticos poderán utilizar todas as súas vantaxes sen necesidade de acudir persoalmente ás oficinas de presentación.

– Fomentarase a utilización por parte da cidadanía dos servizos que a Axencia ofrece por vía electrónica, incluída a presentación de autoliquidacións. Para tal efecto, iniciaranse as tarefas para o redeseño da OVT e continuarase coa súa simplificación para facilitar a presentación dos diferentes trámites, a actualización dos programas de axuda e o deseño de novos formularios web máis comprensibles, que mellorarán a experiencia do usuario. Así mesmo, seguirase na liña de impulsar a tramitación telemática e a accesibilidade aos servizos electrónicos da Axencia ampliando os servizos aos cales se pode acceder con sistemas de identificación alternativos á certificación dixital e iniciando as probas para a implantación da sinatura biométrica dos documentos que se asinen de xeito presencial nas oficinas. Con esta medida aforrarase o uso do papel.

– Aumentaranse os servizos que se ofrecen na OVT para facilitar a achega de solicitudes, respostas a requirimentos por parte da cidadanía para facer posible, entre outros, a presentación de reclamacións económico-administrativas dun xeito máis sinxelo.

– Unha vez posta en marcha a aplicación para que a cidadanía poida relacionarse dunha forma máis próxima e máis sinxela coa Axencia naqueles trámites e información que máis demanda, incrementaranse os servizos dispoñibles a través desta.

– Habilitarase a posibilidade de que a presentación de impostos, para a que é competente a Comunidade Autónoma, poida facela unha terceira persoa que declare responsablemente que ten a representación do suxeito pasivo, o que redundará en facilitar esta presentación sen necesidade de máis trámites, sen prexuízo dos labores de comprobación que poida realizar a Administración.

– Unha vez consolidado o servizo de atención telefónica ao contribuínte a través dun único número, impulsarase a creación dun centro de atención integral ao contribuínte, que se sumará ás oficinas tradicionais de atención persoal.

– Continuarase a potenciar a práctica das notificacións de forma telemática a través de https://notifica.xunta.gal/, o que, ademais de supoñer un aforro de custo e tempo, redunda nunha maior eficiencia na súa práctica coa conseguinte redución do número de notificacións devoltas.

– Facilitarase a comunicación coa cidadanía mediante a simplificación da linguaxe utilizada nos documentos máis habituais que envía a Atriga, engadindo un resumo no cal se lle indique que é o documento, para que se lle envía, que ten que facer e onde obter máis axuda, coa finalidade de mellorar o cumprimento voluntario ao eliminar as barreiras de comprensión.

– Continuarase a impulsar o pagamento mediante cargo na conta e domiciliación bancaria nas presentacións telemáticas co obxectivo de lles facilitar ao máximo aos obrigados tributarios o cumprimento da súa obriga de pagamento, para evitar desprazamentos ás entidades bancarias, especialmente nos tributos periódicos.

1.1.2. Información e asistencia presencial.

Levaranse a cabo as seguintes medidas:

Durante este ano consolidaranse os novos sistemas de pagamento que se foron poñendo á disposición dos cidadáns desde 2022 como as transferencias, o pagamento cunha tarxeta de crédito ou débito, os terminais punto de venda (TPV) tanto físicos, nas delegacións territoriais, como virtuais, o xiro postal ou o bizum. Cómpre agora darlles maior difusión para que se coñeza este servizo, que ten como obxectivo facilitar o cumprimento das obrigas tributarias da cidadanía, ao evitar desprazamentos e ao xerar aforro de tempo nos trámites que hai que realizar ante a Atriga.

– Irase ampliando na prestación de servizos de información e asistencia ao contribuínte de forma presencial o sistema de cita, co cal se mellorará principalmente a asistencia personalizada, se minimizarán os tempos de espera dos contribuíntes, se evitarán desprazamentos innecesarios e se logrará unha mellor e máis eficiente asignación dos recursos públicos.

Así, continuarase coa atención preferente a maiores de 65 anos, que comezou a prestarse en 2022, así como coa atención presencial, incluída a relativa á información xeral e á de expediente existente, e coa asistencia á cidadanía na confección da autoliquidación do imposto pola transmisión onerosa de medios de transporte usados (modelo 620) posta en marcha en 2023. Ademais, iniciarase a posta en marcha da posibilidade de prestar esa asistencia por parte da Atriga na confección da autoliquidación polo imposto de transmisións patrimoniais e actos xurídicos documentados (modelo 600).

1.1.3. Adaptación dos modelos de declaración aos últimos cambios normativos e revisión continua de todos os modelos normalizados segundo as necesidades e suxestións que fagan chegar as persoas administradas, de xeito que permitan un maior detalle no tratamento da información que conteñen, ampliando a efectividade dos intercambios de información e o manexo das diversas fontes de datos, e facilitando o exercicio, por parte das persoas obrigadas tributarias, dos seus dereitos e o cumprimento das súas obrigacións, simplificando e reducindo as obrigacións de carácter formal.

1.1.4. Garantirase o acceso a unha información de calidade ao utilizar unha terminoloxía comprensible na elaboración das guías de tributos que xestiona a Axencia.

1.1.5. Continuarase cos programas de comunicación que fomenten a conciencia fiscal colectiva dos cidadáns. Para lograr este obxectivo, levaranse a cabo durante este exercicio as seguintes actuacións:

– Considérase fundamental a educación tributaria dos máis novos, polo que se realizarán charlas informativas dirixidas ao alumnado de educación primaria e secundaria dos centros educativos da Comunidade Autónoma de Galicia, co obxectivo de transmitir valores e actitudes favorables á responsabilidade fiscal. Ademais, para un mellor coñecemento da práctica administrativa na aplicación dos tributos, fomentarase a educación fiscal dos estudantes de secundaria, con visitas aos servizos centrais da Atriga e ás súas delegacións territoriais.

– En liña coa actuación anterior, colaborarase coa Consellería de Cultura, Educación, Formación Profesional e Universidades impartindo charlas relativas á materia de Cultura Financeira para axudar á formación do profesorado de secundaria da Comunidade Autónoma de Galicia.

– No ámbito universitario, realizaranse non só charlas informativas tendentes a transmitir valores e actitudes favorables á responsabilidade fiscal senón que tamén se informarán os estudantes das posibilidades de traballo na Administración tributaria como saída profesional.

– Realizaranse campañas de sensibilización contra a fraude fiscal dirixidas á poboación en xeral a través da páxina web, con campañas informativas, de carácter institucional, en prensa, radio, televisión ou en redes sociais. Tamén se informará sobre as novas ferramentas que a Atriga pon á disposición da cidadanía para o cumprimento das súas obrigas tributarias ou para poñer en coñecemento da Administración condutas fraudulentas a través da canle de denuncias existente na páxina web.

1.1.6. Tal e como sinala a Lei 1/2015, do 1 de abril, de garantía da calidade dos servizos públicos e da boa administración, a procura dos obxectivos de boa administración e de calidade, que debe ser un obxectivo prioritario na actuación do persoal da Atriga, non pode ser unha tarefa unilateral da Administración, senón que debe contar, de forma fundamental, coas achegas e demandas cidadás como instrumentos de mellora imprescindibles para abordar a plena satisfacción das persoas usuarias dos servizos públicos.

Por iso, continuarase coa liña iniciada en anos anteriores da realización de enquisas ás persoas que fan uso dos servizos que presta a Atriga, tanto de forma presencial como de forma electrónica, para recoller periodicamente a opinión dos usuarios destes e tomar decisións con base na información obtida. Para tal efecto, aumentaranse as enquisas que hai que realizar tanto sobre o grao de satisfacción da atención presencial e telefónica da Atriga como dos seus servizos web.

En efecto, a plena modernización das administracións públicas implica non soamente un cumprimento estrito do principio de legalidade senón tamén a necesidade de instaurar e concibir unha nova base de relacións entre a Administración e a cidadanía para coñecer cales son as súas necesidades e expectativas, e responder a elas en cada momento. Estas ferramentas axudarán a Axencia a mellorar a calidade do servizo prestado, a aprender das súas experiencias e a incorporalas como unha parte máis da súa xestión, para, de forma proactiva, coñecer os puntos fortes e débiles, e mellorar o servizo e atención que presta a Atriga.

1.2. Colaboración social e intercambio de información.

Neste ámbito, ademais de consolidar e mellorar a colaboración social e o intercambio de información, intensificaranse os labores de captación de información destinados á obtención dos datos tributarios necesarios para a toma de decisións sobre a realización de actuacións de control e para alixeirar as cargas administrativas dos contribuíntes.

En especial, profundarase na colaboración e no intercambio de información que permitan mellorar os labores de información e asistencia, sobre todo coa finalidade de aclarar a tributación das distintas operacións, xa que moitas veces a complexidade do sistema tributario pode provocar erros nas autoliquidacións presentadas polos contribuíntes, que poden ser evitados a través da comunicación clara dos criterios que utiliza a Administración tributaria, ao evitar a inseguridade xurídica. Neste sentido é preciso distinguir o que debe considerarse fraude fiscal, é dicir, a intención deliberada de defraudar a Facenda pública, que debe ser corrixida cos controis extensivo e intensivo e, se é o caso, a través dos procedementos sancionadores, dos erros derivados da complexidade do sistema tributario, que deben ser combatidos principalmente a través da prevención. Aquí cobran especial importancia os asesores fiscais, que aconsellan e informan os contribuíntes das consecuencias tributaria dos seus actos ou negocios.

Cómpre, polo tanto, ampliar as canles de comunicación cos ditos profesionais para, por unha banda, trasladarlles os criterios da Administración e, por outra, coñecer os problemas que se atopan na tributación de determinadas operacións ou no cumprimento das obrigas formais, tentando dar seguridade xurídica no primeiro caso e facer máis sinxelas as segundas. A realización de seminarios ou xornadas por parte da Atriga, como a de Actualización de criterios de actuación no ámbito tributario autonómico galego, que tivo lugar neste 2025, ou a participación nas organizadas por outros colectivos para tratar temas tributarios, contribúe a esa posta en común que facilita a aplicación dos tributos e diminúe a litixiosidade. Neste sentido, continuarase ofrecendo aos colaboradores con máis actividade na presentación a posibilidade de formular suxestións para a mellora dos servizos que se ofertan na OVT da Atriga e fomentarase a colaboración social mediante a subscrición de convenios de colaboración con novos colectivos de profesionais que actúen como representantes dos contribuíntes para a presentación das súas autoliquidacións tributarias.

En canto ao intercambio de información como elemento fundamental que serve ao mesmo tempo para facilitar o cumprimento das obrigas fiscais do contribuínte e combater a fraude fiscal, a Atriga seguirá aumentando o intercambio de información e a súa calidade, principalmente, cos seguintes organismos:

1.2.1. A Axencia Estatal de Administración Tributaria (en diante, AEAT):

A Lei 22/2009, do 18 de decembro, pola que se regula o sistema de financiamento das comunidades autónomas de réxime común e cidades con estatuto de autonomía e se modifican determinadas normas tributarias, cede ás comunidades autónomas o rendemento total ou parcial producido no seu territorio dunha serie de tributos estatais e delega a competencia para a xestión dunha parte destes tributos. Concretamente, as comunidades autónomas teñen asumida a xestión dos impostos sobre o patrimonio, sucesións e doazóns, transmisións patrimoniais e actos xurídicos documentados, o depósito de residuos en vertedoiros, a incineración e a coincineración de residuos, así como determinados tributos sobre o xogo.

Esta lei consagra, como principio esencial, a colaboración entre as administracións tributarias do Estado e das comunidades autónomas para a xestión dos tributos estatais cedidos e, en particular, o fomento e desenvolvemento de intercambios de información e a planificación coordinada das actuacións de control sobre estes.

Por este motivo, no seo do Consello Superior para a Dirección e Coordinación da Xestión Tributaria (órgano colexiado integrado por representantes da Administración tributaria do Estado e das comunidades autónomas e cidades con estatuto de autonomía encargado de coordinar a xestión dos tributos cedidos) e dos consellos territoriais para a Dirección e Coordinación da Xestión Tributaria (órganos colexiados integrados por representantes da Administración tributaria do Estado e da comunidade autónoma ou da cidade con estatuto de autonomía de que se trate, con funcións de coordinación da xestión dos tributos cedidos no seu respectivo ámbito, de acordo coas directrices do Consello Superior para a Dirección e Coordinación da Xestión Tributaria), esta axencia está a potenciar os intercambios de información con transcendencia tributaria coa finalidade de aumentar a eficacia da xestión tributaria, mellorar a asistencia aos contribuíntes, ao reducir as cargas administrativas que pesan sobre estes, e, especialmente, a intensificar a loita contra a fraude fiscal e a economía somerxida.

A Atriga participa no Consello Superior para a Dirección e Coordinación da Xestión Tributaria, que se reúne de forma trimestral, así como nos seguintes grupos de traballo:

– O grupo de intercambio de información: ten por obxecto establecer procedementos de colaboración e intercambio de información entre a AEAT e as CC.AA.

– O grupo de coordinación normativa: ten por obxecto analizar e propoñer modificacións normativas en relación cos tributos cedidos.

Así, a colaboración coa AEAT continuará potenciando:

a) A planificación coordinada de actuacións e o intercambio de información, dentro das liñas establecidas nas directrices xerais do Plan anual de control tributario e alfandegueiro de 2025 da AEAT.

b) O reforzo dos intercambios de información entre a AEAT e a Atriga, co obxectivo de fornecer periodicamente a información con transcendencia tributaria, mediante cruzamentos de información entre as bases de datos das distintas administracións tributarias. Iso redundaría nun mellor control da fraude fiscal e, paralelamente, nunha diminución do custo administrativo de aplicación dos tributos.

Todo iso con independencia de que esta información conste en poder doutros órganos, entes ou organismos dos seus respectivos ámbitos territoriais, xa que tanto a AEAT como a Atriga teñen asumido o compromiso de levar a cabo cantas actuacións sexan necesarias para solicitar destes a información acordada.

No ámbito internacional, destacan as medidas relativas á transparencia na información e na consolidación de todos os intercambios de información para fins fiscais impulsados na Unión Europea e no ámbito da OCDE, ao abeiro de varios instrumentos como os intercambios automáticos de información sobre contas financeiras (CRS), do informe país por país (CbC), as distintas directivas de cooperación administrativa (DAC), a Foreign Account Tax Compliance (FATCA) ou o establecemento do sistema electrónico central de información sobre pagamentos transfronteirizos (CESOP), como sinala a AEAT no seu plan de control 2025. Dada a importancia que esta información ten para a aplicación de tributos de carácter patrimonial, como os xestionados pola Atriga, faise necesario profundar no intercambio desta información, sobre todo no establecemento das canles informáticas para a súa subministración; todo iso no seo do Consello Superior para a Dirección e Coordinación da Xestión Tributaria.

c) O intercambio de información sobre os datos censuais máis relevantes dos obrigados tributarios a través do censo único compartido, en particular os relativos ao domicilio fiscal e ás súas modificacións para a detección de posibles deslocalizacións co propósito de lograr unha menor tributación.

d) A transmisión periódica á AEAT da información contida en declaracións tributarias correspondentes a tributos cedidos e sobre os valores reais de transmisión de bens e dereitos comprobados no curso de procedementos de control. Nesta materia, a Axencia continuará colaborando no desenvolvemento e na implantación dos intercambios de información que lle sexan requiridos.

e) A subministración de información á AEAT para o control das deducións establecidas pola Comunidade Autónoma no IRPF, os datos de familias numerosas e de graos de discapacidade recoñecidos na Comunidade Autónoma de Galicia, os gastos en gardarías e centros de educación infantil autorizados, así como os datos das fianzas de arrendamentos de inmobles.

f) A colaboración para verificar o cumprimento dos requisitos para gozar das deducións da cota autonómica do IRPF aprobadas pola Comunidade Autónoma, sobre todo naqueles supostos en que se precisa un recoñecemento administrativo previo para gozar do beneficio fiscal, mediante a confección de rexistros de suxeitos beneficiarios dos citados beneficios fiscais.

g) A colaboración coa AEAT para o control das declaracións dos premios procedentes do xogo.

h) O envío de dilixencias de colaboración a outras administracións, especialmente nas actuacións de control da fraude neste ámbito de colaboración, mediante a posta en coñecemento dos feitos ou circunstancias con transcendencia tributaria para outras administracións tributarias que se poñan de manifesto no curso da tramitación de actuacións ou procedementos tributarios.

i) O intercambio de información nos casos en que, como resultado dun procedemento de comprobación, se determine a improcedencia do tributo cuxa xestión lle corresponde e, por conseguinte, a procedencia doutro xestionado por outra Administración tributaria.

j) O intercambio de información en relación co cumprimento da condición de vivenda habitual cando no curso dun procedemento se detecte o incumprimento desa condición, co fin de controlar a aplicación de exencións, beneficios fiscais ou tipos reducidos no imposto sobre o patrimonio, no imposto sobre transmisións patrimoniais e actos xurídicos documentados, e no imposto sobre sucesións e doazóns, ou a dedución prevista para esta materia no IRPF.

1.2.2. Colaboración con outros organismos e administracións públicas:

Algúns convenios subscritos con outras administracións públicas para a cesión de datos recollen, pola súa vez, a obtención de información en poder desas administracións sobre bens, dereitos, rendas ou actividades dos contribuíntes, que permiten que a Axencia Tributaria mellore os servizos prestados ao contribuínte, para favorecer o cumprimento voluntario das súas obrigacións fiscais e, sobre todo, a loita contra a fraude fiscal. Estes acordos adoitan incluír tamén outras formas de colaboración que van máis aló do intercambio de datos.

Entre estes convenios de intercambio de información e outras formas de colaboración destacan os seguintes:

1.2.2.1. O Colexio de Rexistradores da Propiedade e Mercantís e Colexio Notarial: para o intercambio de información sobre operacións susceptibles de tributar no ámbito dos tributos xestionados pola Atriga.

A colaboración entre a Xunta de Galicia, o Consello Xeral do Notariado e o Colexio Notarial de Galicia ten un grande interese para o control do cumprimento das obrigas tributarias, dado o gran número de feitos impoñibles suxeitos a gravame que quedan reflectidos ou incorporados nos documentos notariais. Neste campo tanto o orixinario Convenio de colaboración entre a Xunta de Galicia, o Consello Xeral do Notariado e o Colexio Notarial de Galicia para a aplicación das novas tecnoloxías na xestión tributaria, do 22 de decembro de 2010, coma o que está vixente do 15 de febreiro de 2024, evidencian unha colaboración moi activa e eficaz dos notarios coa Administración tributaria en tres ámbitos fundamentais. O primeiro, no relativo á presentación telemática dos impostos, facilitando así en gran medida o cumprimento das obrigacións formais dos contribuíntes. O segundo, no referente á subministración de información aos obrigados tributarios sobre a correcta tributación das operacións que realizan, ofrecendo, deste xeito, unha importante ferramenta de prevención da fraude. E, en terceiro lugar, na achega de información necesaria para a verificación das operacións realizadas.

Neste sentido, seguirase afondando no desenvolvemento de aplicacións informáticas que combinen ambas as dúas fontes de información e que permitan, dunha maneira automatizada, detectar con fiabilidade os supostos de incumprimentos tributarios, mellorando a eficiencia na acción comprobadora, dado o grande avance técnico dos últimos anos e a mellora tecnolóxica desenvoltos tanto pola Axencia como polo Colexio Notarial.

1.2.2.2. A Dirección Xeral de Tráfico: a información que figura no Rexistro Xeral de Vehículos, como rexistro público, é de gran relevancia para a aplicación dos tributos cedidos, tanto para a comprobación de feitos ou bases impoñibles non declarados como para a verificación da procedencia de beneficios fiscais, en particular, os relativos á actividade de compravenda de vehículos usados. Neste ámbito, subscribirase coa Dirección Xeral de Tráfico (DXT) un convenio que regulará a mutua colaboración entre ambas as dúas para o intercambio electrónico dos datos do Rexistro de Vehículos e do cumprimento das obrigas fiscais, respectivamente, que terá un indubidable impacto positivo na cidadanía, xa que se axilizarán os trámites para realizar o cambio de titularidade dos vehículos, ao facilitarse unha tramitación integramente electrónica a todo tipo de interesados, minimizando o intercambio de datos persoais e automatizando, no posible, a acreditación de requisitos nos procedementos administrativos tanto tributarios como de tráfico e seguridade viaria.

1.2.2.3. A Dirección Xeral do Catastro: a información contida no Catastro inmobiliario resulta de grande importancia, sobre todo para a aplicación dos tributos de base patrimonial. O Catastro permite detectar bens inmobles non declarados, algo de especial relevancia no ámbito do imposto sobre o patrimonio e do imposto sobre sucesións. E, do mesmo xeito, facilita a comprobación dos cambios de titularidade de bens inmobles que poidan ser constitutivos de feitos impoñibles para os efectos do imposto sobre doazóns ou no imposto sobre transmisións patrimoniais e actos xurídicos documentados.

Unha novidade significativa que supuxo un novo impulso na colaboración entre o Catastro e a Atriga foi a entrada en vigor no ano 2022 da figura do valor de referencia, que pasa a ser a base impoñible dos impostos que gravan as transmisións de bens inmobles (imposto sobre sucesións e doazóns e imposto sobre transmisións patrimoniais e actos xurídicos documentados), salvo que o prezo, a contraprestación ou o valor declarado fose superior. A normativa prevé que, nos supostos en que os contribuíntes impugnen o valor de referencia ao solicitar unha rectificación da autoliquidación ou recorrer contra unha liquidación, a Dirección Xeral do Catastro emita un informe vinculante á vista da documentación que conste no expediente como proba. Por este motivo, durante o ano 2022 e en cumprimento do establecido no Convenio de colaboración entre a Secretaría de Estado de Facenda (Dirección Xeral de Catastro) e a Atriga, prorrogado neste ano 2025 por catro anos máis, para o intercambio de información sobre o mercado inmobiliario e a coordinación de actuacións relativas ao valor de referencia, puxéronse en funcionamento novas canles de comunicación co Catastro para xestionar coa máxima axilidade, as impugnacións deste valor e solicitar os informes correspondentes, así como para poder dispoñer por parte da Atriga dos datos relativos ao ben, nos termos previstos no citado convenio.

1.2.2.4. As administracións tributarias de tributos locais: reviste grande importancia a colaboración e a subministración de información entre os organismos que xestionan tributos locais e autonómicos. A Atriga continuará durante o ano 2025 fomentando esta colaboración tanto en materia xestora como inspectora ou recadadora, sobre todo, tendo en conta a similitude dalgúns impostos locais cos impostos xestionados pola Axencia, así como a mellora que en información tributaria e bases de datos esta veu realizando nos últimos anos.

1.2.2.5. A propia Administración pública galega e outras administracións públicas, en especial o Estado, as comunidades autónomas e as corporacións locais, en relación cos datos que posúan ou operacións nas cales interveñan e que teñan efectos tributarios.

2. Control posterior. Control extensivo e intensivo.

Se as actuacións de información e asistencia e as de colaboración social son medidas de control preventivo cuxa finalidade é eliminar as cargas fiscais indirectas aos contribuíntes e fomentar o cumprimento voluntario das súas obrigacións fiscais, as actuacións de control posterior reforzan eses obxectivos e perseguen a mellora do cumprimento, ao favorecer a corrección na declaración de feitos impoñibles e na aplicación da normativa tributaria aplicable, e ao desincentivar as condutas dirixidas a evitar a declaración dos supostos gravados. Isto cobra especial relevancia nos tributos periódicos como o imposto sobre o patrimonio, os tributos sobre o xogo ou os impostos ambientais.

Por outra banda, desde a creación do Departamento de Planificación do Control Tributario e a asunción de funcións coordinadas de análise da información dispoñible, avanzouse na adecuada detección das áreas de risco e na mellora da eficiencia na loita contra a fraude fiscal; do mesmo xeito, a análise dos resultados das actuacións de control e investigación están a permitir constatar que as actuacións de regularización da situación tributaria inciden tamén de forma significativa nunha mellora do cumprimento voluntario das obrigacións tributarias con independencia de que os obrigados fosen obxecto de regularización.

Coa asunción da xestión recadadora que ata o momento están a levar as zonas de recadación por parte da Axencia, este departamento colaborará coa Área de Recadación para a análise e a definición de perfís e indicadores de risco recadador.

A correcta identificación das áreas de risco e a selección dos obrigados tributarios obxecto de comprobación convértense nunha peza esencial do control tributario, non só desde o punto de vista da eficiencia na actuación da Administración tributaria, senón tamén na diminución dos custos indirectos daqueles contribuíntes cumpridores das súas obrigacións tributarias. Para iso, faise necesario profundar nos mecanismos de selección mellorando os sistemas informáticos de detección a través da implantación de novas ferramentas informáticas de tratamento de datos e introducindo novas variables, tanto obxectivas, derivadas dos novos datos de que dispón a Administración tributaria xurdidos das novas obrigacións de información, como subxectivas, tendo en conta as novas tendencias xurdidas no ámbito tributario referidas ao «compliance tributario» ou boas prácticas, co fin de evitar a litixiosidade existente no ámbito tributario. Este último punto resulta moi notable no ámbito dos impostos patrimoniais, dada a importante penetración neles da figura do asesor fiscal.

Para asegurar a correcta aplicación do sistema tributario establecéronse, por unha banda, unhas comprobacións de carácter xeral que afectan todas as figuras tributarias cuxa aplicación corresponde á Atriga e, por outra, determinadas áreas de risco ou de atención preferente atendendo á natureza e características de cada un dos tributos de referencia, así como ao tipo de control que se vai empregar.

Así, dentro do control posterior, distínguese o control extensivo ou de carácter masivo, que persegue someter a control a totalidade das declaracións presentadas, e o control intensivo (selectivo) e investigación, dirixidos a descubrir e a regularizar as formas máis graves e complexas da fraude fiscal e da economía somerxida, que xeran competencia desleal e prexudican a empresas e particulares que si cumpren correctamente coas súas obrigacións tributarias, reforzando especialmente as actuacións para perseguir as diferentes formas de fraude, evasión e elusión fiscal practicadas polas grandes empresas e os grandes patrimonios.

2.1. Comprobacións de carácter xeral.

2.1.1. Verificación das autoliquidacións e declaracións presentadas, tanto polo que respecta aos datos contidos nelas e á súa correspondencia con outros declarados con anterioridade ou cos datos que constan en poder da Administración tributaria, en especial, aos fornecidos polos índices notariais, nos casos en que o acto ou contrato se formalizou en documento notarial; ou ben aos fornecidos pola Administración galega ou por outras administracións. Así mesmo, constatarase a debida aplicación da normativa, a inexistencia de erros aritméticos e a súa presentación nos prazos regulamentariamente establecidos.

2.1.2. Comprobación das bases impoñibles declaradas nas transmisións de bens e dereitos. En especial, cando se trate de bens inmobles, comprobarase a existencia ou non do valor de referencia previsto na normativa reguladora do catastro inmobiliario e a adecuación da base declarada a aquel; no caso de inexistencia de valor de referencia ou se este non puidese ser certificado pola Dirección Xeral do Catastro, comprobarase o valor declarado conforme os medios establecidos no artigo 57 da LXT. Neste aspecto darase preferencia a aqueles valores declarados que se afasten en maior medida dos valores recollidos na Orde do 20 de decembro de 2021 pola que se regula o medio de comprobación do valor dos bens inmobles, ditame de peritos da Administración, e que poden ser consultados, ben na propia norma, ben na aplicación existente na OVT, ou ben mediante unha consulta por escrito nas delegacións da Atriga. No caso de que proceda practicar unha comprobación de valor, esta realizarase fundamentalmente a través do ditame de peritos, sen prexuízo de que, se a natureza do ben que se vai valorar así o determina, poidan utilizarse outros medios de valoración dos previstos no artigo 57 da LXT.

2.1.3. Comprobación das declaracións informativas e das declaracións censuais presentadas e a súa adecuación aos datos en poder da Administración tributaria, ou ben os fornecidos pola Administración galega ou por outras administracións. Precisamente no ámbito dos tributos periódicos e, máis en concreto, nos impostos ambientais, cobra especial importancia a correcta elaboración e o permanente mantemento dun dos instrumentos de xestión tributaria sobre o cal descansa o control da incidencia ambiental desde o punto de vista tributario, que non é outro que o censo correspondente a cada un destes impostos. As diferentes actuacións de control que se puxeron en marcha nestes anos de funcionamento da Atriga permitiron manter os censos dun xeito acorde á realidade e reconducir as condutas dos obrigados tributarios, fomentando a presentación das autoliquidacións e declaracións tributarias no prazo regulamentariamente establecido e a eliminación ou corrección de erros frecuentes ou criterios incorrectos de aplicación da normativa tributaria.

2.1.4. Comprobación dos puntos de conexión establecidos na Lei 22/2009, do 18 de decembro, pola que se regula o sistema de financiamento das comunidades autónomas de réxime común e cidades con estatuto de autonomía e se modifican determinadas normas tributarias.

2.1.5. Verificación dos ingresos que se produzan sen a presentación da correspondente autoliquidación e, se é o caso, o inicio dos procedementos sancionadores oportunos.

2.1.6. Investigación de feitos impoñibles non declarados e que resulten da información de que dispón a Administración tributaria ou lle sexa fornecida no exercicio do deber de información ou colaboración.

2.2. Áreas de atención preferente.

2.2.1. Actuacións relativas ao sector inmobiliario e á transmisión de bens mobles, sobre todo a investigación dos cambios de titularidade a partir da información existente nos diversos rexistros públicos e administrativos ou nas adxudicacións en poxas públicas, a comprobación da orixe dos fondos utilizados nos pagamentos nas transaccións inmobiliarias, o control de arrendamentos de predios urbanos ou transmisións de cotas nas comunidades de bens, entre outras actuacións.

2.2.2. Constitución de concesións ou autorizacións administrativas que impliquen o outorgamento de facultades de xestión de servizos públicos ou atribución do uso privativo ou aproveitamento especial do dominio ou uso público.

2.2.3. Comprobación da base impoñible no imposto sobre sucesións, en especial a súa adecuación coa información contida nos rexistros administrativos e fiscais, a existencia de actos dispositivos anteriores do causante para a procedencia da súa adición, a realidade das cargas, débedas e gastos e a súa condición de deducibles ou a correcta tributación por este imposto dos seguros sobre a vida.

2.2.4. Comprobación do cumprimento dos requisitos para gozar de beneficios fiscais.

Os beneficios fiscais supoñen unha quebra dos principios constitucionais establecidos no artigo 31 da CE polos que se debe rexer o sistema tributario, xa que supoñen excepcións ou diminucións na tributación de determinados colectivos fronte á xeneralidade de contribuíntes, aínda que amosen unha mesma capacidade económica pola adquisición ou utilización de rendas. E esta diferenza de tratamento fiscal suporía unha contravención dos principios constitucionais de xeneralidade, igualdade ou capacidade económica de non responder a outros principios constitucionalmente protexidos. Polo tanto, en canto responden a outros obxectivos distintos da pura capacidade económica e actúan como un instrumento de política económica, deben ser obxecto de especial comprobación para garantir o logro dos obxectivos perseguidos co seu establecemento e a adecuada contribución da cidadanía ao sostemento dos gastos públicos.

Neste campo prestarase especial atención ás reducións na base impoñible ou deducións na cota referidas á vivenda habitual, así como ás empresas e participacións en entidades, ou para fomentar a constitución ou adquisición de empresas ou negocios profesionais, tanto das condicións que se deben cumprir no momento da devindicación como dos comportamentos posteriores a que obriga a norma; os tipos reducidos ou bonificados regulados nos diferentes tributos; as deducións autonómicas no imposto sobre o patrimonio ou a exención aplicable á transmisión de vehículos de transporte usados a favor de empresarios que teñen como actividade habitual a compravenda de vehículos.

2.2.5. A comprobación dos domicilios declarados e as súas modificacións para corrixir deslocalizacións por simulacións de cambios de residencia, en colaboración e coordinación coas restantes comunidades autónomas e a AEAT, co único fin de lograr de forma indebida unha menor contribución fiscal.

2.2.6. A comprobación de diversas operacións que, pola experiencia de actuacións de anos anteriores, poidan encubrir operacións simuladas ou erros na súa correcta autoliquidación, como as extincións do condominio, as operacións de endebedamento e garantía, os recoñecementos de débeda, os documentos mercantís que realizan función de xiro, as renuncias ás herdanzas, as doazóns con causa onerosa ou as transmisións de metais preciosos, obxectos usados ou antigüidades.

2.2.7. En relación coa tributación sobre o xogo, analizarase a información de que dispoñan outros órganos administrativos de relevancia para o control tributario, fundamentalmente, a fornecida polos órganos competentes en materia de xogo, así como a procedente dos obrigados a fornecer información, co obxecto de verificar e comprobar tanto os datos e as bases impoñibles declaradas polos suxeitos pasivos de máquinas, bingo, apostas, rifas, tómbolas e combinacións aleatorias e casinos, como no que se refire á detección de feitos impoñibles non declarados e á comprobación do cumprimento dos requisitos para gozar de beneficios fiscais. En concreto, nas modalidades do xogo do bingo diferentes ao bingo electrónico comprobarase, en cada período impositivo, que o suxeito pasivo manteña o emprego con respecto ao ano 2022 para poder aplicar o tipo de gravame do 30 %. Por outra banda, comprobarase o correcto cumprimento da obriga de levar os libros de rexistro para os efectos tributarios.

2.2.8. En relación co imposto sobre o depósito de residuos en vertedoiros, a incineración e a coincineración de residuos, comprobaranse as declaracións censuais presentadas e a veracidade dos datos declarados, así como os obrigados tributarios que, debendo estar rexistrados no censo, non cumprisen as obrigacións censuais. Comprobarase que as cantidades de residuos depositadas nos vertedoiros radicados na Comunidade Autónoma de Galicia, así como as cantidades de residuos incinerados en instalacións de incineración e de coincineración se corresponden cos datos declarados nas autoliquidacións presentadas polos suxeitos pasivos que xestionan as ditas instalacións, así como a concordancia dos tipos de residuos cos tipos de gravame aplicados. Doutra banda, comprobarase a correspondencia das cantidades declaradas como exentas e verificarase que se cumpran as condicións exixidas para estaren exentas de tributación por este imposto.

2.2.9. En relación cos tributos propios ambientais, e coa finalidade de que as diminucións de recadación destes tributos sexa consecuencia da diminución da contaminación e non da fraude fiscal, analizarase a información de que dispoñan outros órganos administrativos de relevancia para o control tributario como, por exemplo, a fornecida polos órganos competentes en materia de ambiente, industria, enerxía e augas, tanto no que se refire á comprobación da veracidade dos datos declarados nas declaracións censuais, nas declaracións informativas e nas propias autoliquidacións, como á comprobación do cumprimento dos requisitos para gozar de beneficios fiscais, como para a detección de feitos impoñibles non declarados.

2.2.10. En relación coas taxas e prezos, analizarase a información fornecida polos seus órganos xestores e estreitarase a colaboración con eles en relación cos procedementos de control que se vaian desenvolver; tamén se estudará a posibilidade de asumir procedementos de xestión en determinados casos.

2.3. Grandes patrimonios.

A comprobación dos grandes patrimonios, sobre todo nos impostos de patrimonio e de sucesións e doazóns, é fundamental non só desde o punto de vista do principio de eficacia na actuación da Administración tributaria senón para facer efectivos principios como a capacidade económica e a progresividade.

Para este control, resulta esencial a colaboración coas outras administracións públicas, especialmente coa AEAT, como xestora doutro imposto sobre o patrimonio que é o imposto temporal de solidariedade das grandes fortunas, e como a receptora e subministradora da información derivada das diferentes declaracións informativas, como, entre outras, a declaración de préstamos e créditos, e operacións financeiras relacionadas con bens inmobles (modelo 181), declaración de valores, seguros e rendas (modelo 189), que inclúe tamén a declaración de bens e dereitos situados no estranxeiro (modelo 720), criptomoedas (modelos 171, 172 e 721), así como a declaración tributaria especial (modelo 750), e a través dos convenios de intercambio de información asinados con outros Estados, así como a información subministrada polo Colexio de Rexistradores da Propiedade e Mercantís e o Colexio Notarial.

As actuacións neste campo basearanse, fundamentalmente, en:

2.3.1. Investigación dos obrigados tributarios que, pola contía do patrimonio persoal ou das súas rendas, teñan a obrigación de presentar imposto sobre o patrimonio ou poidan concorrer doazóns non declaradas. Para estes efectos, incidirase naqueles contribuíntes en que os seus signos externos de riqueza (patrimonio inmobiliario, bens de luxo...) non se corresponden coa ausencia de declaración ou co importe do patrimonio declarado.

2.3.2. Verificación dos requisitos previstos no artigo 4.8 da Lei 19/1991, do 6 de xuño, do imposto sobre o patrimonio, relativo á exención dos bens e dereitos das persoas físicas necesarios para o desenvolvemento da súa actividade empresarial ou profesional e das participacións en entidades, ou nos artigos 7.4 e 8.4 do texto refundido das disposicións legais da Comunidade Autónoma de Galicia en materia de tributos cedidos polo Estado, aprobado polo Decreto lexislativo 1/2011, do 28 de xullo, no imposto sobre sucesións e doazóns. En especial, verificarase se existe unha verdadeira actividade económica ou se os bens exentos ou obxecto de redución son realmente necesarios para o desenvolvemento desta actividade económica, para evitar que bens persoais ou de luxo poidan pasar como bens afectos a unha actividade económica, así como a comprobación do mantemento do valor de adquisición e da exención nos casos en que a normativa o exixa.

2.3.3. Comprobación das transmisións encubertas de inmobles a través de sociedades interpostas, en especial, a aplicación indebida da exención regulada no artigo 338 da Lei 6/2023, do 17 de marzo, dos mercados de valores e dos servizos de investimento.

2.3.4. Verificación das operacións inmobiliarias realizadas por empresarios para efectos da delimitación da súa tributación polo imposto sobre transmisións ou polo IVE, en especial, a comprobación da verdadeira condición de empresario, o cumprimento dos requisitos para a renuncia á exención neste último imposto, prevista no artigo 20.2 da Lei 37/1992, do 28 de decembro, do imposto sobre o valor engadido, así como a súa correcta tributación polo tipo incrementado do imposto de actos xurídicos documentados.

2.3.5. Comprobación daquelas operacións e mecanismos de planificación fiscal agresiva que resulten anómalos en relación co fin perseguido, distinto do aforro fiscal, e que poden ser constitutivos de simulación ou conflito na aplicación da norma, sobre todo os relacionados coa transmisión de bens inmobles.

3. Control na fase recadadora.

A xestión recadadora consiste no exercicio da función administrativa conducente á realización dos créditos tributarios e demais ingresos de dereito público establecidos a favor da Facenda pública de Galicia.

O principal obxectivo dunha xestión recadadora eficiente é o cobramento efectivo das débedas, aínda que non sexa de forma inmediata, tanto facilitando o seu cumprimento espontáneo ao simplificar o procedemento e as formas de pagamento e ao reducir os custos asociados, como previndo e loitando contra a fraude fiscal ao definir áreas de acción que permitan detectar riscos potenciais que dificulten ou impidan a eficacia do cobramento, en especial en período executivo, cando non se atenderon voluntariamente as obrigacións de pagamento, e reducir posibles riscos de cobramento para evitar no máximo posible que determinadas figuras poidan ser empregadas para eludir ou dilatar o pagamento.

Resultan especialmente relevantes para a consecución destes obxectivos non só as actuacións que poidan levar a cabo as unidades encargadas das funcións de recadación senón que tamén resulta fundamental a súa coordinación e colaboración tanto con outras áreas da Axencia como con outras administracións e organismos, sexan ou non tributarios.

A fase recadadora centrarase principalmente nas seguintes actuacións, en liña coas levadas a cabo en anos anteriores, e nas que convén incidir polos bos resultados alcanzados:

3.1. Seguimento do procedemento de ingreso mediante as entidades colaboradoras autorizadas, controlando a correcta transferencia dos fondos, así como o envío dos ficheiros de información nos prazos establecidos, e a correcta validación dos documentos de cobramento presentados polos obrigados tributarios.

3.2. Ampliación e mellora dos medios de pagamento existentes na liña de apostar polo fomento das novas tecnoloxías como un instrumento idóneo para conxugar os principios de eficacia da Administración tributaria e a limitación dos custos indirectos ao contribuínte, así como para facilitarlles ao máximo aos obrigados tributarios o cumprimento das súas obrigacións fiscais. En particular, e sen prexuízo doutras melloras que poidan establecerse:

– Unha vez habilitada en 2024 a transferencia bancaria como medio de pagamento, avanzarase nos trámites para estender a domiciliación bancaria a todos os contribuíntes que teñan conta aberta en entidades bancarias dentro da zona SEPA.

– Progresarase na implantación da posibilidade do pagamento mediante o emprego dos caixeiros das entidades bancarias colaboradoras na xestión recadadora coa Atriga incrementado estas.

3.3. Seguimento e control dos ingresos realizados co obxectivo de detectar posibles incidencias e acadar unha maior eficacia na súa aplicación.

3.4. Potenciar a coordinación coa AEAT no marco do convenio de recadación subscrito e modificado en 2017, co fin de mellorar a tramitación dos expedientes en constrinximento xestionados ao seu abeiro.

3.5. Coordinación cos órganos competentes para realizar os pagamentos orzamentarios da Xunta de Galicia co obxecto de posibilitar a práctica de embargos dos dereitos de cobramento a favor de persoas que sexan, así mesmo, titulares de débedas xestionadas pola Atriga, así como establecer as canles informáticas en colaboración co resto das administracións públicas para detectar a existencia de créditos a favor de debedores da Facenda pública galega a través de intercambios de información.

3.6. Continuando coa asunción progresiva das funcións de recadación en vía de constrinximento iniciada coa supresión das zonas de recadación da Coruña, Lugo e Ourense no ano 2023 e Vigo en 2024, suprimirase a Zona de Recadación de Pontevedra, e a Atriga asumirá a partir de 2026 as funcións desempeñadas por esta, en virtude do previsto na Lei 7/2022, do 27 de decembro, de medidas fiscais e administrativas. Cómpre agora desenvolver os traballos necesarios para a asunción das ditas funcións.

3.7. Potenciación de canles para os intercambios de información con transcendencia tributaria con outras administracións públicas para o establecemento de procedementos automatizados de embargo, en particular, para o embargo de soldos e salarios e pensións.

3.8. Control e seguimento de actuacións concretas, como poden ser os expedientes de compensación de débedas, a sucesión nestas de persoas físicas, xurídicas e entidades sen personalidade, as derivacións de responsabilidade atendendo especialmente ás operacións de baleiramento patrimonial, os expedientes de adiamentos e fraccionamentos, as débedas paralizadas ou suspendidas por un recurso ou unha reclamación que estean en período executivo, e dos recursos de reposición contra as providencias de constrinximento e embargo, sobre todo coa finalidade de que estas figuras non sexan utilizadas para lograr dilacións nos procedementos ou elusións do pagamento.

3.9. Intensificación das actuacións de análise e control sobre a situación das débedas en período executivo, tratando de identificar grupos de debedores e tipoloxías de débeda que presentan maior risco de cobramento promovendo actuacións e medidas que comporten reducir o dito risco de cobramento e fomentar a regularización voluntaria.

3.10. Impulso dos labores de investigación, así como de obtención de información, en virtude das facultades conferidas ao persoal funcionario de recadación, en especial mediante visitas e comparecencias en locais de negocios ou establecementos para realizar actuacións executivas e de obtención de información en relación con determinados grupos de debedores con niveis elevados de débeda ou débedas recorrentes e que non amosan intención de regularizar a súa situación para combater a frustración das actuacións de embargo e reducir o risco de cobramento.

3.11. Revisión completa dos expedientes de insolvencia e falidos, co fin de extremar a procura de bens do debedor realizables que revelen como inexacta esa situación inicialmente prevista como insolvencia.

3.12. Mellora do control e seguimento da débeda pendente, en particular, en fase de embargo, realizando actuacións que permitan axilizar o seu cobramento reducindo os tempos de xestión recadadora.

3.13. Actuacións de control das situacións concursais comunicadas en colaboración con xuíces e administradores concursais co obxectivo de atinxir a máxima operatividade no pagamento das débedas que teñan este carácter, con independencia de que o proceso culmine coa aprobación do convenio ou entre na fase de liquidación.

3.14. Realización das actuacións necesarias que posibiliten a colaboración nos procedementos de alleamento forzoso de bens inmobles embargados noutras comunidades autónomas e no embargo de pagamentos orzamentarios efectuados por outras comunidades autónomas.

3.15. Especial atención ás actuacións que xiran ao redor das poxas, plenamente integrado o seu procedemento no portal do Boletín Oficial del Estado, como último paso da recadación en período executivo –tales como valoracións, comunicacións, publicidade– co obxectivo de aumentar a afluencia de licitadores e lograr unha maior adxudicación dos bens obxecto destas.

3.16. Comprobación da existencia de avais, así como doutro tipo de garantías que poidan estar constituídas dentro de calquera procedemento, que garantan o cobramento das débedas que non fosen ingresadas no prazo legal, para a súa correspondente execución, co fin de lograr a máxima satisfacción posible das débedas garantidas.