BDNS: (Identif.): 832652.
De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo se pode consultar na Base de datos nacional de subvencións:
https://www.infosubvenciones.es/bdnstrans/GE/es/convocatoria/832652
Primeiro. Entidades colaboradoras
Poderán ser entidades colaboradoras as entidades financeiras privadas con personalidade xurídica e plena capacidade de obrar, validamente constituídas, que cumpran os seguintes requisitos:
– Ter oficinas comerciais abertas, cando menos, nos concellos de máis de 20.000 habitantes das catro provincias galegas.
– Ter colaborado na xestión financeira da Xunta de Galicia nos últimos dous anos.
A entidade financeira colaboradora actuará en nome do órgano concedente para todos os efectos relacionados coa subvención, e entregará e distribuirá os fondos públicos aos comercios adheridos ao programa.
Segundo. Obxecto
O obxecto da colaboración é a entrega e distribución das axudas do Programa de dinamización e incentivo do consumo de peixe e marisco frescos nos comercios retallistas da Comunidade Autónoma de Galicia a través dos bonos Peixe en peixarías.
Para estes efectos, subscribirase o oportuno convenio de colaboración coa Consellería do Mar, segundo o modelo que figura como anexo I da orde.
Terceiro. Bases reguladoras
As bases reguladoras para a concesión de axudas do Programa de dinamización e incentivo do consumo de peixe e marisco frescos nos comercios retallistas da Comunidade Autónoma de Galicia a través dos bonos Peixe en Peixerías publicaranse conxuntamente coa convocatoria do programa.
Cuarto. Compensación económica
A compensación económica a favor da entidade colaboradora polos gastos de posta en funcionamento, seguimento e control do Programa bonos Peixe en peixarías é de 80.000,00 €, financiados con cargo á aplicación orzamentaria 16.02.723B.480.0 dos orzamentos xerais da Comunidade Autónoma de Galicia para o ano 2025.
Quinto. Prazo de presentación de solicitudes
O prazo máximo de presentación de solicitudes será de cinco días naturais, contados a partir do seguinte ao da publicación desta orde no Diario Oficial de Galicia.
Santiago de Compostela, 14 de maio de 2025
Alfonso Villares Bermúdez
Conselleiro do Mar