O Xurado Provincial de Clasificación de Montes Veciñais en Man Común de Pontevedra resolveu, na súa reunión do 26.3.2025, aprobar o deslindamento parcial entre as comunidades de montes veciñais en man común (CMVMC) de Alba (Pontevedra) e Curro (Barro), con base nos seguintes feitos e consideracións técnicas.
Antecedentes e consideracións técnicas:
Primeiro. O 28.9.2022 o presidente da CMVMC de Alba presenta solicitude de deslindamento entre a CMVMC de Alba (Pontevedra) e a CMVMC de Curro (Barro). Os montes veciñais en man común (en diante, MVMC) afectados por este deslindamento son:
– MVMC de Curro (ID: 2453) da CMVMC de Curro.
– MVMC de Castrove (ID: 2947) da CMVMC de Alba.
Segundo. Consta no expediente a seguinte documentación do deslindamento consonte o artigo 53 da Lei 7/2012, do 28 de xuño, de montes de Galicia (LMG):
– Acta do apeo do deslindamento do 23.9.2022.
– Acta de conciliación número 2/2023 entre as comunidades no Xulgado de Paz de Barro do 16.5.2023.
– Certificado do 16.4.2024 do secretario da CMVMC de Alba coa conformidade do presidente da aprobación en Asemblea Xeral do 30.10.2022.
– Certificado do 16.4.2024 do secretario da CMVMC de Curro coa conformidade do presidente da aprobación en Asemblea Xeral do 24.2.2023.
– Memoria descritiva co plano de deslindamento e cartografía en formato dixital no Datum ETRS89/UTM zona 29N EPSG: 25829. Asinado o 28.6.2023 pola enxeñeira técnica forestal colexiada número 740 do COETF de Galicia. A emenda posterior produce a modificación desta.
– Informes de validación gráfica catastral con CSV: 7Z97W4PVHE0PGHMM.
Terceiro. A liña de deslindamento proposta ten unha lonxitude de 794 metros e está composta polos seguintes puntos:
Punto 01 – x: 527.476,37 y: 4.704.392,22
Punto 02 – x: 527.007,72 y: 4.704.141,62
Punto 03 – x: 526.769,35 y: 4.704.019,84
No traballo de gabinete establécense dous puntos de deslindamento secundarios para respectar o dominio público da estrada (PS1, PS2), polo que neste tramo non existen lindes entre ambos os montes (o deslindamento realizarase coa Administración competente).
Punto PS1 – x: 527.458,89 y: 4.704.382,87
Punto PS2 – x: 527.463,68 y: 4.704.385,44
O punto 03 é o punto onde converxen a CMVMC de Alba, a CMVMC de Curro e a CMVMC de Campañó.
Revisada a cartografía das resolucións de clasificación de ambos MVMC, detéctase que existen lindes entre ambos na zona norte do deslindamento. Na zona sur do deslindamento, ben que invade o esbozo previo do monte veciñal da CMVMC de Campañó, xustifícanse os lindes por un erro gráfico xa que a Xunta Reitora da CMVMC de Campañó asina o 8.5.2024 a súa conformidade.
O deslindamento entre ambos os montes veciñais está formada por dous tramos:
Tramo 1: do punto 01 o punto PS02.
Tramo 2: do punto PS02 o punto 03.
A liña do deslindamento non respecta a liña do Instituto Xeográfico Nacional entre os concellos de Barro e Pontevedra.
A liña do deslindamento produce modificacións na cartografía dos esbozos de clasificación das comunidades de Alba, Curro e Campañó. O Servizo de Montes realiza os axustes necesarios para enlazar a liña de deslindamento co resto da cartografía existente.
O Servizo de Montes considera que a solicitude se axusta ao establecido no artigo 53 da LMG, polo que propón que o Xurado aprobe o deslindamento segundo a liña presentada.
Cuarto. O artigo 53 da LMG establece que o Xurado Provincial de Clasificación de Montes Veciñais en Man Común, logo do exame da documentación presentada, ditará resolución, que será publicada no Diario Oficial de Galicia e notificada ás comunidades interesadas.
Á vista do exposto, este xurado
RESOLVE:
Aprobar o deslindamento parcial entre a CMVMC de Alba (Pontevedra) e a CMVMC de Curro (Barro), nos termos antes indicados.
Contra esta resolución, que pon fin á vía administrativa, poderase interpoñer recurso de reposición perante o Xurado Provincial de Clasificación de MVMC de Pontevedra no prazo dun mes de acordo co disposto nos artigos 123 e 124 LPAC; ou ben interpoñer directamente recurso contencioso-administrativo perante o Xulgado do Contencioso-Administrativo no prazo de dous meses de acordo cos artigos 8 e 46 da LXCA.
Pontevedra, 21 de maio de 2025
Antonio Crespo Iglesias
Presidente do Xurado Provincial de Clasificación de Montes Veciñais
en Man Común de Pontevedra