O Pleno do Concello de Pontevedra, na sesión ordinaria que tivo lugar o 19.5.2025, adoptou, entre outros, o seguinte acordo:

«(...) Primeiro. Resolver as alegacións formuladas no proceso de información pública e oficial subsecuente á aprobación inicial do estudo de detalle para o reaxuste de aliñacións e fondos edificables (parcelas C e D1, zona verde e rede viaria da UA5) unidade de actuación núm. 5 do PXOM (avenida do Uruguai e rúas Galera, Arcebispo Malvar e Fonte da Moureira) Pontevedra (...), ao abeiro das motivacións contidas nos informes do equipo redactor (...) ás que prestou conformidade a arquitecta municipal xefa da OTPXU no informe do 13.2.2025 (...) e consonte o que motiva na fundamentación xurídica deste acordo, ao constatarse a adaptación do estudo de detalle ás previsións do planeamento que desenvolve e á súa normativa de aplicación, sen menoscabar os dereitos adquiridos, incluídos os de paso e servidumes de luces e vistas das persoas propietarias lindeiras co ámbito, sen alterar as rasantes ou incrementar o aproveitamento que outorga ás parcelas de resultado C e D1 o PERI e instrumento de equidistribución aprobados, sen xerar medianeiras vistas, sen reducir as dimensións de patios con servidumes preexistentes, e que se aproba para garantir a continuidade da aliñación da vía de nova apertura coas edificacións existentes fóra do polígono e permitir a materialización dos aproveitamentos correspondentes ás referidas parcelas de resultado.

Segundo. Prestar aprobación, con carácter definitivo, ao proxecto denominado Estudo de detalle reaxuste de aliñacións e fondos edificables (parcelas C e D1, zona verde e rede viaria da UA_5) (36038_ED_UA5_202409_AD), redactado (...) (Espinosa & Rodríguez Architects Projects Manager, S.L.P.), co contido e formato adaptado ao disposto nas normas técnicas de planeamento urbanístico de Galicia; instrumento urbanístico formulado por Arqura Hoimes, Fondos de Activos Bancarios (...), que tivo entrada no Rexistro Xeral do Concello de Pontevedra o 19.3.2025, baixo os números 2025013479, 2025013481, 2025013482 e 2025013484, e conformado pola arquitecta municipal da OTPXU o 8.4.2025, e ao cal se incorporan, como parte integrante deste, os informes emitidos pola Dirección Xeral de Patrimonio Cultural da Xunta de Galicia, pola Dirección Xeral de Urbanismo da Consellería de Vivenda e Planificación de Infraestruturas da Xunta de Galicia e polo Servizo Provincial de Costas, da Dirección Xeral da Costa e do Mar da Secretaría de Estado de Medio Ambiente do Ministerio para a Transición Ecolóxica e o Reto Demográfico, de datas 25.2.2025, 28.10.2024 e 20.11.2024, respectivamente.

Terceiro. Dispor a publicación do anuncio do acordo de aprobación definitiva do estudo de detalle no Diario Oficial de Galicia, con indicación expresa de que o seu contido íntegro estará á disposición do público na sede electrónica do Concello de Pontevedra sede.pontevedra.gal

Unha vez publicado o anuncio no Diario Oficial de Galicia, o instrumento de planeamento definitivamente aprobado será inscrito no Rexistro de Ordenación do Territorio e Planeamento Urbanístico de Galicia, por petición deste Concello, para o que se remitirá un exemplar en formato dixital, debidamente dilixenciado pola Secretaría do Pleno.

Ademais de no Diario Oficial de Galicia e na sede electrónica, o acordo será publicado, xunto co índice de documentos e planos, unha vez recibido o certificado de inscrición no Rexistro de Ordenación do Territorio e Planeamento Urbanístico de Galicia, no Boletín Oficial da provincia de Pontevedra, para lograr a súa eficacia e efectividade.

Cuarto. Notificar este acordo individualmente a todas aquelas persoas que formularon alegacións durante o período de información pública subsecuente á aprobación inicial do estudo de detalle –ás que se lles remitirán tamén os informes que serven de base, como resposta razoada, á resolución das alegacións que se conteñen neste acordo–, así como a todas aquelas que figuren como interesadas ou constituídas en parte no expediente, con ofrecemento dos recursos procedentes e con comunicación expresa á Dirección Xeral de Patrimonio Cultural da Xunta de Galicia, á Dirección Xeral de Urbanismo da Consellería de Vivenda e Planificación de Infraestruturas da Xunta de Galicia e ao Servizo Provincial de Costas da Dirección Xeral da Costa e do Mar da Secretaría de Estado de Medio Ambiente do Ministerio para a Transición Ecolóxica e o Reto Demográfico. (...)».

O que se fai público para a súa executividade, significándose que contra o acto de aprobación definitiva do estudo de detalle, que pon fin á vía administrativa, quen se considere lexitimado poderá interpoñer directamente recurso contencioso-administrativo, ante a Sala do Contencioso-Administrativo do Tribunal Superior de Xustiza de Galicia, no prazo de dous meses contados a partir do día seguinte ao da publicación deste anuncio, consonte o establecido nos artigos 10.1 e 46.1 da Lei 29/1998, do 13 de xullo, reguladora da xurisdición contencioso-administrativa. Todo isto sen prexuízo de que se poida interpoñer calquera outro recurso que se entenda máis procedente e sexa conforme dereito.

Así mesmo, infórmase que nestas datas xa está publicado na sede electrónica do Concello de Pontevedra (ligazón exacta no día de hoxe (http://www.pontevedra.gal/areas/urbanismo-e territorio/planeamento urbanistico/planeamento-de-desenvolvemento/) o contido íntegro do documento aprobado definitivamente polo Pleno do Concello de Pontevedra, en cumprimento do disposto na Lei 19/2013, de transparencia, acceso á información pública e bo goberno.

Pontevedra, 29 de maio de 2025

Miguel Anxo Fernández Lores
Alcalde