A Lei 22/2009, do 18 de decembro, pola que se regula o sistema de financiamento das comunidades autónomas de réxime común e cidades con estatuto de autonomía e se modifican determinadas normas tributarias e as correspondentes leis de creación dos impostos propios da Comunidade Autónoma de Galicia outórganlle á propia Comunidade Autónoma competencia normativa para regular os aspectos de xestión, liquidación e aplicación dos tributos cedidos e propios.

A situación derivada dos incendios forestais que se están producindo no territorio galego determina unha situación de emerxencia humanitaria e social para a cidadanía afectada, debido aos danos persoais e materiais que se ocasionaron. Isto fai necesario articular, no ámbito dos impostos xestionados pola Axencia Tributaria de Galicia, mecanismos para facilitar o cumprimento das obrigas tributarias por parte dos cidadáns afectados. Para estes efectos, adóptanse a través desta orde medidas de carácter excepcional, en relación cos prazos de cumprimento das obrigacións tributarias relativas á presentación de declaracións e autoliquidacións e ao ingreso da débeda tributaria autoliquidada. Así, os prazos indicados que, conforme a normativa reguladora dos tributos, non estivesen vencidos na data de inicio dos incendios producidos en Galicia a partir do 28 de xullo de 2025 que provocaron a activación do Peifoga en situación 2, de acordo cos datos facilitados pola Axega, amplíanse ata o 30 de setembro de 2025. Beneficiaranse desta ampliación de prazos os obrigados tributarios que teñan o seu domicilio fiscal nos concellos afectados polos referidos incendios, así como aqueles obrigados tributarios que, sen ter domicilio fiscal nos concellos afectados, tivesen un establecemento comercial, industrial, turístico e/ou mercantil ou instalacións e/ou explotacións forestais, agrícolas ou gandeiras radicados neles.

En consecuencia, de acordo coa competencia establecida no artigo 34.6 da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Un. Medidas excepcionais e temporais en relación cos prazos para a presentación de declaracións e autoliquidacións e para o pagamento dos impostos aplicados pola Axencia Tributaria de Galicia

1. No ámbito dos impostos aplicados pola Axencia Tributaria de Galicia, os prazos relativos ás obrigas tributarias consistentes na presentación de declaracións, autoliquidacións e documentación complementaria, o ingreso da débeda tributaria autoliquidada e a presentación de solicitudes de prórroga para a presentación de autoliquidacións e documentación do imposto sobre sucesións, que non estivesen vencidos na data de inicio dos incendios producidos en Galicia a partir do 28 de xullo de 2025 que provocaron a activación do Peifoga en situación 2, de acordo cos datos facilitados pola Axega, amplíanse ata o 30 de setembro de 2025.

2. A ampliación prevista no número 1 aplicarase, logo de solicitude mediante escrito presentado xunto coa declaración, autoliquidación ou solicitude de prórroga, aos obrigados tributarios que teñan o seu domicilio fiscal nos concellos afectados polos referidos incendios, así como a aqueles obrigados tributarios que, sen ter domicilio fiscal nos concellos afectados, tivesen un establecemento comercial, industrial, turístico e/ou mercantil ou instalacións e/ou explotacións forestais, agrícolas ou gandeiras radicados neles.

No caso de que xa tivesen cumpridas as obrigas de xeito extemporáneo na data en que esta orde sexa publicada no Diario Oficial de Galicia, poderán presentar a solicitude de aplicación da ampliación ata o 30 de setembro de 2025.

Dous. Eficacia

Esta orde produce efectos desde o mesmo día da súa publicación no Diario Oficial de Galicia.

Santiago de Compostela, 29 de agosto de 2025

Miguel Corgos López-Prado
Conselleiro de Facenda e Administración Pública