O 20 de agosto de 2025 publicouse no Diario Oficial de Galicia a Resolución do 31 de xullo de 2025 pola que se establecen as bases reguladoras de axudas para o fortalecemento e a ampliación das capacidades dos centros tecnolóxicos galegos mediante o apoio á creación e a mellora de infraestruturas tecnolóxicas e de investigación cofinanciadas pola Unión Europea no marco do programa Galicia Feder 2021-2027, e se procede á súa convocatoria para o ano 2025.

A dita resolución foi modificada pola Resolución da directora da Axencia Galega de Innovación do 23 de setembro de 2025 (DOG número 186, do 26 de setembro), pola cal se amplía o prazo de presentación de solicitudes ata o día 13 de outubro do 2025.

Conforme o artigo 7 das bases reguladoras, relativo ao financiamento, as subvencións financiaranse con cargo ao capítulo VII do orzamento da Axencia Galega de Innovación, coa seguinte aplicación orzamentaria:

Aplicación orzamentaria	2025	2026	2027	2028	Total
07.A2.561A.781.0 2023.00003	500.000 €	2.800.000 €	3.675.000 €	2.775.000 €	9.750.000 €

O número 2 do artigo 10 establece que para a anualidade 2025 só se admitirán os gastos realizados dentro do período comprendido entre a data de presentación da solicitude de subvención e a data límite de execución do gasto establecida no artigo 28 desta resolución.

No punto 5 do artigo 24 das bases reguladoras, sobre a resolución e notificación, indícase que:

«O prazo máximo para resolver e notificarlle a resolución á persoa interesada será de tres meses, contados a partir do día seguinte ao da finalización do prazo de presentación de solicitudes.

Se transcorrese o prazo máximo para resolver sen ditarse resolución expresa, as persoas interesadas poderán entender desestimadas as súas solicitudes por silencio administrativo».

O artigo 28 das bases reguladoras, relativo á xustificación da subvención, establece os seguintes prazos para ter dereito ao pagamento da axuda: o prazo de execución da anualidade 2025, isto é, o prazo de emisión das facturas (realización de gastos) e realización de pagamentos é desde a data de presentación da solicitude ata o 31 de decembro de 2025. O prazo de xustificación da anualidade 2025, isto é, o prazo para a presentación da documentación é o 31 de xaneiro de 2026.

A ampliación do prazo de presentación de solicitudes, a dificultade no estudo e a análise da documentación achegada nalgúns dos proxectos presentados, xunto coa coincidencia do peche de exercicio para emitir documentos contables de compromiso de gasto, imposibilitan resolver a convocatoria antes do prazo de execución da primeira anualidade 2025.

Polo tanto, modifícanse os prazos de execución e xustificación das anualidades e anúlase o crédito correspondente á anualidade 2025, que se transfiere á anualidade 2026.

Consecuentemente con todo o anterior, a directora da Axencia Galega de Innovación, no exercicio das facultades que lle confire o artigo 17.3 do Decreto 50/2012, do 12 de xaneiro, polo que se crea a Axencia Galega de Innovación,

RESOLVE:

Primeiro. Modificación da Resolución do 31 de xullo de 2025 pola que se establecen as bases reguladoras das axudas para o fortalecemento e a ampliación das capacidades dos centros tecnolóxicos galegos mediante o apoio á creación e a mellora de infraestruturas tecnolóxicas e de investigación, cofinanciadas pola Unión Europea no marco do programa Galicia Feder 2021-2027, e se procede á súa convocatoria para o ano 2025 (código de procedemento IN607E).

Un. Modifícase o número 1 do artigo 7. Financiamento e concorrencia, que queda redactado nos seguintes termos:

«1. As subvencións financiaranse con cargo ao capítulo VII do orzamento da Axencia Galega de Innovación, coa aplicación orzamentaria indicada na táboa seguinte:

Aplicación orzamentaria	2026	2027	2028	Total
07.A2.561A.781.0 2023.00003	3.300.000 €	3.675.000 €	2.775.000 €	9.750.000 €	».

Dous. Modifícase o número 2 do artigo 10. Gastos subvencionables, que queda redactado nos seguintes termos:

«2. Para a anualidade 2026 só se admitirán os gastos realizados dentro do período comprendido entre a data de presentación da solicitude de subvención, e que non sexan anteriores ao último trimestre do ano 2025, e a data límite de execución de gasto establecida no artigo 28 desta resolución.

Para o resto de anualidades, admitiranse os gastos realizados dentro do período comprendido entre a data límite de execución de gasto da anualidade anterior e a data límite de execución de gasto da anualidade corrente».

Tres. Modifícase o número 5 do artigo 24. Resolución e notificación, nos seguintes termos:

«5. O prazo máximo para resolver e notificarlle a resolución á persoa interesada será o 31 de marzo de 2026».

Catro. Modifícase o número 2 do artigo 28. Xustificación da subvención, que queda redactado nos seguintes termos:

«2. Prazos de execución e de xustificación:

a) Prazos de execución:

Períodos de emisión das facturas (realización de gastos) e realización de pagamentos dos gastos executados:

		Emisión das facturas (realización de gastos) e realización de pagamentos dos gastos executados
Anualidade 2026	Desde	Data da presentación da solicitude e que non sexan anteriores ao último trimestre do ano 2025
	Ata	31 de decembro de 2026
Anualidade 2027	Desde	1 de xaneiro de 2027
	Ata	31 de outubro de 2027
Anualidade 2028	Desde	1 de novembro de 2027
	Ata	30 de setembro de 2028

b) Prazos de xustificación (presentación da documentación):

		Presentación da documentación xustificativa
Anualidade 2026	Ata	31 de xaneiro de 2027
Anualidade 2027	Ata	30 de novembro de 2027
Anualidade 2028	Ata	15 de outubro de 2028

En todo caso, considerarase gasto realizado o que foi efectivamente pagado con anterioridade á finalización do prazo de execución».

Disposición derradeira única. Entrada en vigor

Esta resolución entrará en vigor o día seguinte ao da súa publicación no Diario Oficial de Galicia.

Santiago de Compostela, 8 de xaneiro de 2026

Carmen Cotelo Queijo
Directora da Axencia Galega de Innovación