DOG 25 do 6/2/2026 - EXTRACTO da Orde de 9 de xaneiro de 2026 pola que se establecen as bases reguladoras con carácter plurianual (2026-2027) para a concesión, en réxime de concorrencia non competitiva, das axudas ao posicionamento das empresas galegas como subministradoras en materia de seguridade e defensa, e procédese á súa convocatoria mediante tramitación anticipada de gasto (código de procedemento IN519G).

III. Outras disposicións

Consellería de Economía e Industria

EXTRACTO da Orde de 9 de xaneiro de 2026 pola que se establecen as bases reguladoras con carácter plurianual (2026-2027) para a concesión, en réxime de concorrencia non competitiva, das axudas ao posicionamento das empresas galegas como subministradoras en materia de seguridade e defensa, e procédese á súa convocatoria mediante tramitación anticipada de gasto (código de procedemento IN519G).

BDNS (Identif.): 875048.

De conformidade co previsto nos artigos 17.3.b) e 20.8.a) da Lei 38/2003, do 17 de novembro, xeral de subvencións, publícase o extracto da convocatoria cuxo texto completo pódese consultar na Base de datos nacional de subvencións:

https://www.pap.hacienda.gob.es/bdnstrans/GE/es/convocatorias/875048

Primeiro. Obxecto

Estas bases reguladoras teñen por obxecto apoiar a implementación de accións de posicionamento das empresas galegas nos ámbitos da defensa e a seguridade mediante accións de obtención de certificacións específicas, inscrición no Rexistro de Empresas da Dirección Xeral de Armamento e Material (DGAM), homologación de sistemas e produtos, obtención de autorizacións de seguridade e elaboración de propostas de proxectos para participar en convocatorias nacionais ou europeas co obxectivo de preparar as empresas galegas no seu avance ou diversificación cara a converterse en entidades capaces de fornecer bens ou servizos nos ámbitos da defensa e a seguridade.

Segundo. Entidades beneficiarias

As entidades beneficiarias das axudas serán as empresas privadas (persoas xurídicas) con personalidade xurídica que realicen actividade económica e conten con centro de traballo na Comunidade Autónoma de Galicia, e que inicien os pasos obrigatorios para aproveitar a diversificación en materia de defensa e seguridade coas certificacións, homologacións e/ou habilitacións necesarias para iso.

Terceiro. Contía e intensidade da axuda

As axudas reguladas por esta orde teñen a natureza xurídica de subvencións.

A intensidade das axudas será dun 80 % do importe total considerado como subvencionable e cun máximo de 75.000,00 euros por beneficiario.

Cuarto. Anticipos

Poderase anticipar ata o 25 % do importe da subvención concedida, sen que se supere a anualidade prevista en cada exercicio orzamentario.

Quinto. Prazos

O prazo de presentación de solicitudes iniciarase ás 9.00 horas do quinto día hábil seguinte á publicación desta convocatoria no Diario Oficial de Galicia.

O prazo finalizará ás 14.00 horas do día en que se cumpran os tres meses desde a apertura, excepto cando se produza o esgotamento do crédito.

Para cobrar a subvención, as entidades beneficiarias deberán presentar electronicamente, no prazo máximo do 15 de novembro de 2026 os gastos correspondentes á anualidade 2026, e ata o 15 de outubro de 2027 os gastos relativos ao ano 2027, a través da documentación xustificativa da subvención.

Santiago de Compostela, 9 de xaneiro de 2026

María Jesús Lorenzana Somoza
Conselleira de Economía e Industria