O nomeamento de persoal interino para o desempeño con carácter transitorio de prazas reservadas a funcionarios e a contratación temporal de persoal laboral da Xunta de Galicia están regulados no Decreto 37/2006, do 2 de marzo (DOG núm. 48, do 9 de marzo).

Mediante a Resolución do 8 de xuño de 2017, da Secretaría Xeral de Emprego (DOG núm. 124, do 30 de xuño) dispúxose a inscrición no Rexistro de Convenios e Acordos Colectivos de Traballo e a publicación no Diario Oficial de Galicia do acordo de integración do persoal do Consorcio Galego de Servizos de Igualdade e Benestar no Convenio colectivo único do persoal laboral da Xunta de Galicia.

Na súa epígrafe cuarta estaba previsto que se aplicase o réxime do Decreto 37/2006, do 2 de marzo, na provisión temporal do persoal do Consorcio e que se abrise un prazo extraordinario para que as persoas interesadas puidesen inscribirse nas listas reguladas polo Decreto 37/2006, do 2 de marzo, correspondentes ás categorías propias do Consorcio Galego de Servizos de Igualdade e Benestar ou naquelas que son análogas ás categorías do V Convenio colectivo único para o persoal laboral da Xunta de Galicia.

Mediante a Resolución do 24 de febreiro de 2025 (DOG núm. 44, do 5 de marzo) publicouse o Acordo do Consello da Xunta de Galicia do 27 de decembro de 2024 polo que se aprobaba a relación de postos de traballo do Consorcio Galego de Servizos de Igualdade e Benestar.

Na dita resolución disponse que a aprobación da relación de postos de traballo do Consorcio Galego de Servizos de Igualdade e Benestar comporta a aplicación do réxime transitorio que figura no seu anexo II, no cal se prevé a substitución das listas propias do Consorcio Galego de Servizos de Igualdade e Benestar polas listas reguladas polo Decreto 37/2006, do 2 de marzo, na data que expresamente se determine mediante resolución da Dirección Xeral de Emprego Público e Administración de Persoal.

En virtude do exposto, mediante a Resolución do 24 de febreiro de 2025, da Dirección Xeral de Emprego Público e Administración de Persoal (DOG núm. 41, do 28 de febreiro), abriuse un prazo extraordinario para que as persoas interesadas que declarasen estar incluídas nalgunha das listas xestionadas polo dito Consorcio puidesen solicitar a inclusión nas listas reguladas polo Decreto 37/2006, do 2 de marzo, así como a valoración dos servizos que prestaron nesta entidade, segundo o baremo establecido no artigo 9 do dito decreto.

Mediante a Resolución do 10 de decembro de 2025, da Dirección Xeral de Emprego Público e Administración de Persoal (DOG núm. 244, do 18 de decembro), publicáronse as listas definitivas para o desempeño transitorio de prazas reservadas a persoal funcionario e a contratación temporal de persoal laboral da Xunta de Galicia, nas cales se incorporaban as solicitudes presentadas no prazo extraordinario aberto para as persoas incluídas nas listas do Consorcio Galego de Servizos de Igualdade e Benestar e no prazo ordinario establecido no artigo 6 do Decreto 37/2006, do 2 de marzo, finalizando o proceso de inclusión e baremación.

A Dirección Xeral de Emprego Público e Administración de Persoal, unha vez realizadas as comprobacións técnicas necesarias para garantir o correcto funcionamento dos sistemas implicados na cobertura temporal dos postos adscritos ao Consorcio Galego de Servizos de Igualdade e Benestar e para unha mellor efectividade na posta en funcionamento, considerou axeitada a realización dun proxecto piloto co obxecto de asumir nun primeiro momento a xestión dun número limitado dos postos de corpos e escalas existentes no Consorcio.

Mediante a Resolución do 10 de marzo de 2026, da Dirección Xeral de Emprego Público e Administración de Persoal (DOG núm. 51, do 17 de marzo), dispúxose a aplicación como proxecto piloto do Decreto 37/2006, do 2 de marzo, na cobertura temporal dos postos do corpo facultativo de grao medio de Administración especial da Administración xeral, escala técnica facultativa, especialidade de educador e educadora infantil adscritos ao Consorcio Galego de Servizos de Igualdade e Benestar.

De conformidade co establecido na dita resolución, xestionáronse as coberturas temporais dos postos do corpo facultativo de grao medio de Administración especial da Administración xeral, escala técnica facultativa, especialidade de educador e educadora infantil adscritos ao Consorcio Galego de Servizos de Igualdade e Benestar a través da correspondente lista do Decreto 37/2006, do 2 de marzo, desde o 23 de marzo de 2026.

Tras seren realizadas todas as comprobacións técnicas e adaptados os procesos, corresponde agora aplicar as listas do Decreto 37/2006, do 2 de marzo, ao procedemento de cobertura dos restantes postos adscritos ao dito consorcio.

Con base no anterior, esta dirección xeral

RESOLVE:

Primeiro. A aplicación do Decreto 37/2006, do 2 de marzo, ao procedemento de cobertura temporal dos postos adscritos ao Consorcio Galego de Servizos de Igualdade e Benestar.

Segundo. A cobertura destes postos será realizada a través das listas que correspondan reguladas polo Decreto 37/2006, do 2 de marzo, a partir do 21 de maio de 2026.

Terceiro. A cobertura temporal dos postos adscritos ao corpo auxiliar da Administración xeral, escala de persoal de servizos xerais (PSX), e ao corpo de auxiliares de carácter técnico de Administración especial, escala de xerocultor ou xerocultora, a través das listas reguladas polo Decreto 37/2006, do 2 de marzo, realizarase a través das listas propias do Consorcio Galego de Servizos de Igualdade e Benestar mentres non finalice o procedemento de elaboración das listas correspondentes ás ditas escalas reguladas polo Decreto 37/2006, do 2 de marzo.

Cuarto. Contra esta resolución, de conformidade co disposto nos artigos 121 e 122 da Lei 39/2015, do 1 de outubro, do procedemento administrativo común das administracións públicas (BOE núm. 236, do 2 de outubro), as persoas interesadas poderán interpor un recurso de alzada ante o conselleiro de Facenda e Administración Pública no prazo dun mes, contado a partir do día seguinte ao da publicación desta resolución no Diario Oficial de Galicia.

Santiago de Compostela, 11 de maio de 2026

Nuria Aguilar Vázquez
Directora xeral de Emprego Público e Administración de Persoal