Mediante a Resolución da Alcaldía número 463/2024, do 10 de decembro de 2024, emendada pola Resolución da Alcaldía número 483/2026, de 20 de maio de 2026, foi aprobado inicialmente o Plan especial de protección e ordenación do conxunto histórico de Corcubión, e na súa parte dispositiva disponse o seguinte:
Primeiro. Aprobar inicialmente o Plan especial de protección e ordenación do conxunto histórico de Corcubión (PEPOCH), promovido por este concello, elaborado pola empresa Kenda Urbanismo, Ingeniería y Territorio, S.L.
Segundo. Someter o referido instrumento do plan especial a un período de información pública, durante o prazo de dous meses desde a publicación do anuncio de aprobación inicial no Diario Oficial de Galicia, nun dos xornais de maior difusión na provincia e no taboleiro de anuncios e sede electrónica deste concello. Durante o período de información pública poderá examinar o dito plan calquera persoa e formular as alegacións que procedan.
Para tales efectos, queda á disposición das persoas interesadas o expediente administrativo tramitado para que poida ser examinado na Secretaría municipal durante o período de información pública.
Así mesmo, o documento estará á disposición das persoas interesadas na sede electrónica do concello https://sede.corcubion.gal/sxc/es/
Terceiro. Notificarlles individualmente o trámite de información pública a todas as persoas titulares catastrais dos terreos afectados polo ámbito do plan.
Cuarto. Requirir a emisión de informe preceptivo dos órganos e entidades administrativos xestores de intereses públicos afectados e que se relacionan a continuación:
• Delegación do Goberno.
• Confederación Hidrográfica Galicia-Costa.
• Ministerio de Industria, Comercio e Turismo (en materia de telecomunicacións), artigo 35 da Lei 9/2014.
• Dirección Xeral de Patrimonio Cultural.
• Axencia Galega de Infraestruturas (en materia de estradas).
• Augas de Galicia.
• Portos de Galicia.
• Dirección Xeral de Urbanismo (en materia do Plan de ordenación do litoral).
• Instituto de Estudos do Territorio (Lei da paisaxe).
Así mesmo, en aplicación do previsto no artigo 189 da Lei 33/2003, do 3 de novembro, do patrimonio das administracións públicas, notificaráselles o dito acordo ás persoas propietarias dos bens de titularidade pública: Administración xeral do Estado (delegado de Economía e Facenda da provincia da Coruña) e Xunta de Galicia (Consellería de Facenda).
Quinto. Suspender o outorgamento das licenzas de parcelación, edificación e demolición na totalidade do ámbito do Plan especial de protección e ordenación do concello de Corcubión (PEPOCH).
Non obstante, de acordo co establecido no artigo 86.3 do Regulamento da Lei do solo de Galicia, a suspensión de licenzas non afectará:
a) As obras de mantemento, conservación e reforma, salvo no caso de obras de rehabilitación integral que sexan equiparables á reconstrución total do edificio non xustificadas en razóns de urxencia ou que supoñan un aumento do volume edificado.
b) As licenzas de primeira ocupación.
c) Os proxectos que cumpran simultaneamente o instrumento de planeamento en vigor (Plan especial do conxunto histórico Corcubión, PECH, e Normas Subsidiarias do Concello de Corcubión) e o Plan especial aprobado inicialmente.
d) Os actos suxeitos ao trámite de comunicación previa, sempre e cando se trate de obras ou actos para a implantación de usos ou actividades autorizados polo novo planeamento.
A suspensión de licenzas terá unha duración máxima de dous anos, contados desde a aprobación inicial do Plan especial e, en calquera caso, extinguirase coa aprobación definitiva do planeamento (artigo 47.2 LSG).
Esta suspensión publicarase conxuntamente coa aprobación inicial.
Mentres dure a suspensión de licenzas, poderán autorizarse usos e obras provisionais nos termos do artigo 89 da LSG e do artigo 204 do RLSG.
Corcubión, 21 de maio de 2026
Francisco Javier Domínguez Traba
Alcalde presidente