Para solicitar Chave365 é imprescindible dispoñer dun número de teléfono móbil, no que se recibirá a clave de acceso provisional e as claves de sinatura de cada operación.

Chave365 poderá ser utilizado polas persoas maiores de idade ou menores emancipados/as. A situación de menor emancipado/a acreditarase cunha certificación do Rexistro Civil que recolla esa circunstancia.

O sistema só está dispoñible para persoas físicas, sen prexuízo do seu uso por parte de representantes ou apoderados/as debidamente autorizados/as para estes efectos.

Non poderá solicitarse a alta en Chave365 en nome doutra persoa mediante unha simple autorización, salvo que se achegue un poder notarial orixinal xeral ou específico para a emisión de Chave365.

A alta en Chave365 pode realizarse:

• De forma telemática, a través da sede electrónica da Xunta de Galicia, onde é preciso premer sobre o botón de “Tramitar en liña” e dispoñer de certificado dixital, DNI electrónico ou Cl@ve permanente. Unha vez cuberto o formulario de alta e asinada a presentación, chegarán as claves de acceso ao teléfono móbil especificado. Se escolles a opción de certificado dixital ou DNI electrónico, lembra que precisarás ter instalada Autofirma.
• De forma presencial, para o que é necesario que a persoa interesada acuda persoalmente a algún dos órganos ou unidades administrativas que realizan as funcións de rexistro de usuarios de Chave365 e acredite a súa identidade mostrando o seu DNI ou NIE orixinais, válidos e vixentes. Para as persoas estranxeiras, a identificación farase mediante:
  • TIE (tarxeta de identificación de persoas estranxeiras).
  • Tarxeta vermella (asilo), certificado de rexistro de cidadáns/ás da UE ou documento oficial de concesión do NIE xunto co seu pasaporte.