Nova York, 13 de outubro de 2024

O secretario xeral da Emigración, Antonio Rodríguez Miranda, participou nun encontro coa colectividade galega na emblemática Casa de Galicia de Nova York. O evento, que reuniu a membros da comunidade galega da área, serviu para reforzar os lazos de unión entre Galicia e os emigrantes que residen nos Estados Unidos, nun ambiente de confraternidade e identidade compartida.

Miranda destacou durante a súa intervención a importancia da colectividade galega en Nova York, que a través do seu traballo e compromiso mantén viva a cultura e as tradicións galegas fóra das nosas fronteiras. O evento contou cunha rica programación cultural, con actuacións musicais como a da Agrupación Folclórica Colexiata do Sar, que levou a nosa cultura desde a capital galega ata a cidade de Nova York, e tamén artísticas, que reflectiron a esencia de Galicia, desde as súas raíces folclóricas ata as expresións culturais contemporáneas.

A Casa de Galicia de Nova York, como centro de referencia para os galegos nesta cidade, desempeña un papel fundamental na preservación da nosa cultura e na creación dun espazo onde as novas xeracións de galegos residentes no exterior poden manter o seu vínculo con Galicia. O secretario xeral reiterou o apoio da Xunta ás iniciativas culturais e sociais que promove a galeguidade en todo o mundo.