Poio (Pontevedra), 29 de outubro de 2024

A Xunta destina 15,8 millóns de euros a mellorar e seguir ampliando a Rede galega de atención temperá. Unha rede que, antes de que remate o ano, contará con seis novas unidades, alcanzando as 51 en toda Galicia. Así o destacou a conselleira de Política Social e Igualdade, Fabiola García, que visitou a Casa Rosada de Poio, o lugar no que abrirá a que será a primeira unidade do municipio deste servizo, no que se atende a nenos de ata 6 anos para previr e actuar ante problemas de desenvolvemento.

A visita de Fabiola García, que estivo acompañada do alcalde de Poio, Ángel Moldes, e da directora xeral de Persoas con Discapacidade, Begoña Abeijón, coincide coa publicación o pasado luns no Diario Oficial de Galicia (DOG) da resolución dunha nova orde de axudas para a creación de unidades de atención temperá que estivo dotada con 15,8 millóns de euros e cofinanciada polo programa FSE+ Galicia 2021-2027. Concretamente, o Concello de Poio contará cunha axuda de 266.200 euros para a posta en marcha deste servizo.

A través desta orde, a Xunta de Galicia abrirá seis novas unidades de atención temperá na comunidade: 3 nos concellos de Poio, Rianxo e Gondomar e outras 3 nas agrupacións de municipios de Rois, Padrón, Dodro, Valga e Pontecesures; Miño, Pontedeume e Vilarmaior, e en A Pobra de Trives e San Xoán de Río. Ademais, este investimento permitirá mellorar as condicións das unidades xa en funcionamento para que poidan ampliar o servizo e contratar máis persoal.

Durante a visita, a conselleira subliñou a importante aposta realizada polo Goberno galego para a consolidación, ampliación e mellora da Rede galega de atención temperá. Así, lembrou que no ano 2009 existían na nosa comunidade tan só dúas unidades que daban cobertura a 15 municipios e este ano 2024 rematará con 51 unidades abertas que atenderán a máis de 200 concellos e 5.000 familias.