Moraña, 7 de xaneiro de 2025

O delegado territorial da Xunta en Pontevedra, Agustín Reguera, visitou esta mañá as instalacións da Comunidade de Usuarios de Augas de Santa Cruz de Lamas, no concello de Moraña, que recibiu unha axuda de 12.000 euros da Xunta para mellorar as súas instalacións.

Estas axudas, xestionadas pola dirección xeral de Administración Local, beneficiaron a máis de 90 entidades na área territorial de Pontevedra, cunha achega total nesta área de máis de un millón de euros entre a liña destinada a obras e a destinada a compra de material. No concello de Moraña tamén recibiu unha axuda de preto de 12.000 euros a Comunidade de Usuarios de Augas de Corrigatos.

No caso da comunidade de usuarios de Santa Cruz de Lamas o investimento da Xunta permitiu financiar a limpeza da zona de captación do manantial. Os traballos afectaron a preto de 45 metros cadrados de terreo. Ademais, instaláronse dous novos decantadores que permitirán garantir a pureza da auga utilizada pola comunidade. Por último, instalouse unha nova arqueta, así como elementos interiores tales como chaves de paso. 

Os usuarios que se achegaron esta mañá ata a zona de actuación coincidiron na necesidade de contar con este tipo de axudas que permiten realizar o mantemento das instalacións da entidade.

Neste sentido, o delegado territorial lembrou a importancia destas axudas que “permiten o funcionamento e mantemento dos depósitos que dan servizo a millares de galegos e galegas”. Ademais, Reguera aproveitou a ocasión para agradecer aos membros da directiva da Comunidade de Usuarios de Augas de Santa Cruz de Lamas que “desempeñan un traballo imprescindible de forma totalmente voluntaria”.