Santiago de Compostela, 2 de outubro de 2025

A Xunta de Galicia acaba de dar luz verde ambiental condicionado ao proxecto para implantar un campamento de turismo na parroquia de Baroña, no concello coruñés de Porto do Son, concretamente, nunha parcela cunha superficie total de preto de 12.000 m².

Segundo se conclúe no informe de impacto ambiental (IIA) emitido pola Consellería de Medio Ambiente e Cambio Climático —cuxa resolución foi anunciada hoxe a través do Diario Oficial de Galicia— non son previsibles efectos adversos significativos sobre a contorna derivados deste proxecto, sempre e cando se cumpra cos condicionantes fixados tanto no documento ambiental e na restante documentación analizada, como na propia resolución da Xunta.

Neste sentido, o informe foi elaborado no marco do procedemento de avaliación de impacto ambiental simplificada desta iniciativa empresarial, un trámite no que a documentación presentada polo promotor foi sometida a participación pública, sen que se recibise ningún escrito ou alegación ao respecto, ao tempo que se someteu a consultas por parte dun total de dez organismos interesados.

Froito desas consultas, foron establecidos algúns condicionantes que se recollen na resolución da Dirección Xeral de Calidade Ambiental e Sostibilidade. O informe de impacto ambiental marca tamén o contido que deberá ter o programa de vixilancia e seguimento ambiental, que terá que elaborar o promotor do proxecto.

Así, esas avaliacións consideran que o proxecto non vai ter impactos significativos nos distintos eidos analizados e que sería viable a súa posta en marcha cumprindo certos requisitos establecidos nos seus respectivos informes con relación a aspectos tales como a protección da atmosfera, poboación e saúde, das augas e leitos fluviais, do solo e as infraestruturas, da xestión de residuos, da integración paisaxística e restauración, así como do patrimonio natural e cultural.

Unha vez emitido o IIA, que non exime ao promotor da obriga de obter todas as autorizacións, licenzas, permisos ou informes que resulten legalmente exixibles para poder desenvolver o proxecto, a Consellería procedeu hoxe a darlle publicidade ao seu contido a través do correspondente anuncio publicado no Diario Oficial de Galicia e da súa posta á disposición a través da páxina web da Consellería. Ademais, remitirase ao órgano substantivo, que neste caso é a Axencia Turismo de Galicia.

Características do proxecto

O obxecto do proxecto é a implantación dun campamento de turismo nunha parcela dunha superficie total de case 12.000 metros cadrados. Este novo establecemento turístico contará cun total de 37 parcelas, das que 17 estarán destinadas a acampada en tenda de campaña con acceso peonil e as 20 restantes poderán empregarse para autocaravanas, caravanas e tendas de campaña dispoñendo de acceso rodado. O máximo de ocupación será de preto de 150 persoas.

Tamén haberá dúas edificacións permanentes dunha planta e estrutura sinxela. Unha delas estará dedicada ao acceso, recepción e tenda de artigos de primeira necesidade e a outra, aos servizos sanitarios e de lavandaría.