Santiago de Compostela, 4 de decembro de 2025

O director da Axencia para a Modernización Tecnolóxica de Galicia (Amtega), Julián Cerviño, participou esta mañá no  evento Mistral e o futuro da IA no sector público,  no que se analizaron as tendencias e retos europeos arredor da soberanía tecnolóxica en intelixencia artificial.

O encontro, organizado por Gartner, contou coa intervención do CEO de Mistral, unha das compañías europeas máis destacadas no desenvolvemento de Modelos Grandes de Linguaxe (LLM), que deu a coñecer a estratexia da empresa  para reforzar un ecosistema europeo forte, independente e competitivo fronte ás grandes tecnoloxías globais.

Mistral é unha das poucas iniciativas europeas que compiten no mercado internacional dos LLM, un ámbito actualmente liderado por empresas estadounidenses e chinesas. O proxecto europeo destaca pola súa aposta por modelos abertos, capacidade de execución local e control pleno sobre os datos e os procesos de inferencia.

Durante a reunión analizouse o potencial de dispoñer dun LLM local e soberano, non dependente da nube nin das plataformas corporativas globais. Esta posibilidade encaixa cos obxectivos do Programa Galego de Intelixencia Artificial, concretamente no Eixe 3  Adopción estratéxica da IA, que contempla entre as súas actuacións a posta en marcha dunha Plataforma de servizos transversais de analítica avanzada de datos e intelixencia artificial. A Plataforma inclúe, tamén, o desenvolvemento de modelos de linguaxe propios e a implementación dun LLM galego, que permitiría á Xunta dispoñer de produtos e recursos sen depender de condicións externas.

A iniciativa procura facilitar que Galicia dispoña de infraestruturas e capacidades tecnolóxicas propias que garantan seguridade, control dos datos públicos e privados e aliñamento co marco regulamentario europeo.