Santiago de Compostela, 8 de xaneiro de 2026

A Xunta vén de ampliar para mañá a alerta laranxa por temporal costeiro ao litoral do oeste da Coruña. O aviso está hoxe activo no litoral noroeste desta provincia e no de Lugo. Co fin de garantir a seguridade dos bens e as persoas, a  Dirección Xeral de Emerxencias e Interior, da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.

Segundo a Axencia Estatal de Meteoroloxía (Aemet), o fenómeno meteorolóxico adverso estenderase nas primeiras horas do venres ao oeste da Coruña. Agárdase mar combinada con ondas de ata seis metros e ventos de ata forza oito.

Debido á alerta laranxa, a Secretaría  Xeral para o Deporte da Consellería de Presidencia, Xustiza e Deportes anunciou a suspensión da actividade deportiva Xogade e federada no mar nos concellos afectados segundo as previsións dos órganos preditores, e que se poden consultar na web Deporte Galego.

A Xunta lembra a importancia de manterse afastado da liña de costa, isto é, diques, rompentes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

 Aconséllase consultar a páxina web do CIAE 112 (www.axega112.gal), que conta con información meteorolóxica e con ligazóns de interese.