Boqueixón (A Coruña), 21 de xaneiro de 2026

A conselleira de Economía e Industria, María Jesús Lorenzana, acompañada pola directora xeral de Estratexia Industrial e Solo Empresarial, Margarita Ardao, avanzou hoxe que na primeira semana de febreiro a Xunta de Galicia convocará as axudas para a habilitación e mellora das infraestruturas dos parques empresariais por un importe de 3,1 millóns de euros.

Así o anunciou durante unha visita ao polígono de Camporrapado, en Boqueixón (A Coruña), que o pasado ano recibiu 60.000 euros desta liña de apoios para a mellora dos seus accesos viarios. Este parque empresarial foi un dos 73 que resultaron beneficiados en toda Galicia na convocatoria de 2025. Deles, 28 na provincia da Coruña; 22 na de Lugo; 7 en Ourense e 16 en Pontevedra.

Lorenzana explicou que estas axudas cobren ata o 80 por cento do investimento subvencionable, cun máximo de 120.000 euros para as solicitudes individuais e de 138.000 para as conxuntas. Como novidade, sinalou que este ano tamén se poderán destinar a mellorar as infraestruturas e espazos públicos do parque empresarial para contribuír á súa integración paisaxística.         

Xunto con isto, as axudas cobren a implantación e melloras na iluminación pública nas plantas de depuración de augas e nos colectores con vertedura á depuradora municipal; na xestión de residuos dentro do parque empresarial; nas infraestruturas viarias ou nos servizos centralizados de subministración de gas e hidróxeno.

A conselleira destacou que a Xunta está facendo un enorme esforzo para executar máis metros cadrados de solo industrial en Galicia alí onde neste momento hai máis demanda. E recoñeceu que isto hai que acompañalo de apoio económico para os concellos que contan xa con parques empresariais en funcionamento onde é necesario acometer obras de mellora.

Actualmente, o Goberno galego está tramitando máis de 8 millóns de metros cadrados de solo industrial, dos cales, 2 millóns son na provincia da Coruña con actuacións como as ampliacións do polígono de Bértoa, en Carballo, e da  Sionlla, en Santiago de Compostela ou a urbanización das derradeiras fases do parque empresarial de Morás, no concello de Arteixo.