A Xunta destaca en Fitur a consolidación de Galicia como destino turístico privilexiado a través da práctica do surf
A delegada territorial de Ferrol, Martina Aneiros, participou esta tarde na presentación ‘Galicia, destino WSL’ onde destacou a importancia da comunidade á hora de acoller cada ano tres probas oficiais do circuíto mundial desta modalidade deportiva
Insistiu na relevancia de especializar e diversificar a oferta turística e aproveitar os recursos propios para desestacionalizar a demanda
Madrid, 21 de xaneiro de 2026
A delegada territorial da Xunta en Ferrol, Martina Aneiros, participou esta mañá en Madrid na 46ª Feira Internacional de Turismo (Fitur) na presentación Galicia, destino WSL, onde puxo en valor a consolidación da comunidade autónoma “como enclave privilexiado para a práctica do surf” e único territorio do mundo en acoller cada ano tres probas oficiais da World Surf League.
Referiuse así as dúas probas que se celebran en Ferrolterra: o Pantín Classic Galicia Pro, unha cita emblemática na categoría QS 3,000 que cada ano reúne na praia de Pantín, en Valdoviño, aos mellores surfistas do circuíto internacional, e o Surf Festival Ferrol, unha cita máis nova que engloba dúas probas: unha do circuíto longboard e outra do Junior. Completa o calendario galego da WSL o Junior Pro Razo, en Carballo, “unha competición chave para o desenvolvemento do talento mozo e o futuro do surf internacional”, sinalou.
Aneiros destacou estes eventos non só como polo de atracción de deportistas de alto nivel, senón tamén como proxección da marca Galicia, e insistiu na importancia de especializar e diversificar a oferta turística da Comunidade Autónoma e de aproveitar os recursos propios para desestacionalizar a demanda.
Por último, puxo en valor as condicións naturais “excepcionais” de Galicia para o desenvolvemento de eventos deportivos de primeiro nivel durante todo o ano e reivindicou o compromiso da Xunta co turismo deportivo “como motor de desenvolvemento” con propostas coma estas, “que permiten vivir o territorio dunha maneira diferente, activa e auténtica”, recalcou.
Imaxes relacionadas
