Santiago de Compostela, 10 de febreiro de 2026

O Diario Oficial de Galicia (DOG) publica, na súa edición de hoxe, a resolución da Dirección Xeral de Recursos Humanos pola que se nomean os tribunais cualificadores nos procesos selectivos para o ingreso en diversas categorías de persoal estatutario sanitario e na categoría de persoal de servizos xerais.

Deste xeito procédese a nomear os membros dos tribunais, titulares e suplentes que xulgarán os procesos selectivos das categorías de enfermeiro, enfermeiro especialista en enfermería familiar e comunitaria, enfermeiro especialista en obstetricia-xinecoloxía (matrón), enfermeiro especialista en enfermería pediátrica, enfermeiro especialista en enfermería do traballo, persoal de servizos xerais, técnico en coidados auxiliares de enfermería, técnico en farmacia e técnico superior en imaxe para o diagnóstico.

A relación provisional de aspirantes admitidos e excluídos, así como das persoas exentas e non exentas da realización do exercicio de lingua galega nas categorías estatutarias publicouse o pasado 15 de xaneiro de 2026. 

O Servizo Galego de Saúde ten habilitado un enderezo de correo electrónico no que os aspirantes poderán dirixir as súas dúbidas ou consultas: oposiciones@sergas.es. Estas consultas non terán a consideración de recursos.

Proximamente, publicarase a relación definitiva dos aspirantes admitidos e excluídos destas categorías.