A Xunta mantén aberta ata o 15 de maio a inscrición no concurso Eduemprende Idea para alentar o espírito emprendedor entre alumnado de FP de Galicia
O Goberno galego convocou recentemente no Diario Oficial de Galicia unha nova edición desta iniciativa dirixida ao alumnado das ensinanzas de Formación Profesional, deportivas ou de artes plásticas e deseño
Premiaranse seis proxectos, tres na modalidade de ciclos de grao básico e medio e tres na modalidade de ciclos de grao superior e másteres de FP, sendo 3.000€ para o 1º premio, 2.000€ para o 2º e 1.000€ para o 3º
Trátase dunha iniciativa que concorda coa Estratexia de emprendemento ligado ao territorio, que nace da designación de Galicia como Rexión Emprendedora Europea 2025 e que actualmente está en período de consulta co sector
Santiago de Compostela, 15 de febreiro de 2026
A Xunta informa de que ata o 15 de maio está aberto o prazo de inscrición no concurso Eduemprende Idea 2026, convocado recentemente no Diario Oficial de Galicia. Este certame, impulsado pola Consellería de Educación, Ciencia, Universidades e Formación Profesional e a Consellería de Emprego, Comercio e Emigración, busca potenciar a realización de proxectos empresariais polo alumnado das ensinanzas de Formación Profesional, deportivas ou de artes plásticas e deseño, ao que está dirixido o concurso.
A participación nel é por grupos que deberán estar integrados por un mínimo de dúas persoas e un máximo de catro e deberán presentar ideas de negocio orixinais que puideran converterse en novas empresas reais. Deste xeito, búscase impulsar o seu espírito emprendedor.
Neste sentido, premiaranse seis proxectos, tres na modalidade de ciclos de grao básico e medio e tres na modalidade de ciclos de grao superior e másteres de FP, reciben un total de 12.000 euros, sendo 3.000€ para o 1º premio, 2.000 € para o 2º e 1.000 € para o 3º.
Os proxectos vencedores poderán incorporarse a viveiros de empresa da Consellería de Educación, Ciencia, Universidades e Formación Profesional e recibir o asesoramento técnico a través da Rede de polos de emprendemento e apoio ao emprego, dependente da Consellería de Emprego, Comercio e Emigración.
Estratexia de emprendemento ligado ao territorio
A Xunta de Galicia convoca desde 2015 estes galardóns dentro da aposta por promover a cultura emprendedora na comunidade educativa, a posta en marcha de ideas de negocio viables e o aproveitamento do talento. Isto concorda coa Estratexia de emprendemento ligado ao territorio, que nace da designación de Galicia como Rexión Emprendedora Europea 2025 e que actualmente está en período de consulta co sector. Con esta folla de ruta a Xunta busca que as ideas dos emprendedores galegos, tanto dos que están en Galicia como dos que retornan a ela desde o exterior, conten con todos os recursos necesarios para convertelas en realidade.
