A conselleira de Medio Ambiente e Cambio Climático participou na solta de dous exemplares de arao papagaio na contorna da praia da Lanzada
A Xunta destaca o papel dos Centros Galegos de Recuperación de Fauna Silvestre na atención a animais feridos ou débiles para devolvelos ao medio natural
Ángeles Vázquez explica que todo apunta a que estas aves se viron afectadas polos temporais encadeados das últimas semanas, o que lle impediu parar a descansar facendo que acabasen con episodios de esgotamento extremo e debilidade
A responsable autonómica apela á responsabilidade da cidadanía para que dea aviso aos servizos de emerxencias ou medioambientais en caso de atopar animais salvaxes feridos ou débiles, co fin de que poidan ser levados a algún centro de recuperación
Sanxenxo (Pontevedra), 28 de febreiro de 2026
A conselleira de Medio Ambiente e Cambio Climático, Ángeles Vázquez, participou hoxe na solta de dous exemplares de arao papagaio (Fratercula arctica) na contorna da praia da Lanzada que foron recuperados no Centro de Recuperación de Fauna Silvestre (CRFS) de Carballedo, no concello pontevedrés de Cerdedo-Cotobade. A responsable autonómica salientou que este é un exemplo máis do excelente labor que realizan os catro CRFS galegos (un por provincia) na atención e coidado dos animais salvaxes que aparecen feridos ou débiles na comunidade co obxectivo de que poidan volver ao medio natural.
Un dos exemplares liberados hoxe ingresou o pasado día 16 tras ser recollido na praia de Santa Marta, en Cangas do Morrazo, en estado moi débil, con severa hipotermia e deshidratación. O outro apareceu o 24 de febreiro na praia de Pedras Negras, no concello do Grove, co mesmo cadro clínico e con varias feridas.
A conselleira explicou que todo apunta que estes dous araos papagaios -ao igual que outros atopados tanto vivos como mortos na costa galega- se viron afectados polos temporais encadeados que se rexistraron nas últimas semanas, o que lles impediu parar en terra ou nas propias balsas do mar a descansar, facendo que acabasen con episodios de esgotamento extremo e debilidade.
Estas aves adoitan criar en países do norte -como Noruega ou Islandia- e baixar a zonas máis cálidas de alta mar durante o inverno. Neses momentos é cando poden ser arrastradas polos temporais e chegar a costa, como ocorreu nas últimas semanas.
De feito, Ángeles Vázquez lembrou que hai unhas semanas tamén se recolleu un paíño da illa de Madeira (Portugal) nas inmediacións da lonxa de Marín, un exemplar nada habitual na costa galega. Ao igual que no caso dos araos, chegou a Galicia como consecuencia das fortes borrascas e foi liberado novamente na costa tras recuperar as súas forzas no CRFS de Carballedo.
Por iso, a conselleira subliñou o labor que desenvolven a diario os CRFS na protección da biodiversidade e apelou á responsabilidade do conxunto da cidadanía para seguir as recomendacións en caso de achado de animais silvestres feridos ou débiles: non manipulalos directamente, avisar ao teléfono de emerxencias 112 ou aos servizos medioambientais autonómicos co fin de que os axentes medioambientais coordinen a recollida e traslado dos exemplares ao centro correspondente.
