Santiago de Compostela, 20 de abril de 2026

O Diario Oficial de Galicia (DOG) publica hoxe a orde da Consellería do Medio Rural pola que se amplía o prazo da solicitude única das axudas da Política Agraria Común (PAC) ata o vindeiro 15 de maio. Isto realízase conforme á normativa vixente, Real Decreto 1048/2022, que establece a posibilidade de que as comunidades autónomas poidan ampliar o prazo de presentación da solicitude única da PAC como moi tarde ata a devandita data. Deste xeito, con esta ampliación facilítase ás entidades tramitadoras o seu labor.

A convocatoria da PAC publicouse o 20 de febreiro no DOG e con ela prevese beneficiar uns 23.000 agricultores e gandeiros da nosa comunidade. A partir do día seguinte á súa tramitación as entidades colaboradoras conveniadas co Fondo Galego de Garantía Agraria (Fogga) comezaron a rexistrar as solicitudes. Está previsto que a campaña de 2026 supoña para o agro galego unha inxección total de case 220 millóns de euros, unha cifra semellante ás anteriores dentro do Plan Estratéxico da PAC (Pepac) 2023-2027.

A orde publicada hoxe no DOG recolle tamén o paquete de flexibilizacións destinado a minimizar os efectos dos temporais deste pasado outono, que ten como obxectivo aliviar as cargas de obrigas ás que os beneficiarios deben facer fronte para cobrar estas axudas. Debido a causas de forza maior, as autoridades competentes poden establecer flexibilizacións adicionais para paliar os efectos de fenómenos catastróficos, e así, estas novas veñen a sumarse ás que xa había no ámbito da PAC.

Dentro destas modificacións destacan, entre outras, a redución da esixencia da carga gandeira no ecorrexime de pastoreo extensivo ou as flexibilidades na condicionalidade reforzada. Suavizouse tamén a BCAM 7, coa posibilidade de declarar como barbeito aquelas parcelas nas que por causa dos temporais non resultara viable o cultivo sementado ou que non se puidese ter realizado a sementeira.  

Cómpre lembrar que as axudas da PAC son esenciais para o mantemento da actividade agrícola e gandeira, a rendibilidade económica das explotacións e o mantemento de poboación no medio rural. O obxectivo final destas achegas é manter o sector agrícola europeo, de xeito que se compensa ás persoas que traballan no agro polos servizos ambientais que proporcionan, a calidade das súas producións e as esixencias lexislativas de máximo nivel impostas pola Unión Europea a prol da sustentabilidade.

Neste contexto, en relación coa PAC a partir do 2028, o Goberno autonómico demanda cambios nesta proposta comunitaria para evitar un recorte de fondos e a perda dos dous piares tradicionais da PAC, que actualmente blindan as axudas directas e os programas de desenvolvemento rural.

Ligazón á orde no DOG:

https://www.xunta.gal/dog/Publicados/2026/20260420/AnuncioG0426-150426-0001_gl.html