Quiroga (Lugo), 4 de maio de 2026

A Xunta colabora co Concello de Quiroga na recuperación do tramo da estrada municipal de Soldón a Vilarmel que se derrubou o pasado martes como consecuencia das fortes choivas e que constitúe a única vía de acceso rodado aos núcleos de Paradapiñol, Rugando, Cereixido e Vilarmel.

A Administración autonómica estivo desde o primeiro momento en contacto co alcalde de Quiroga para interesarse polo alcance e as consecuencias deste incidente, así como para trasladar a vontade de colaboración, aínda tratándose dun viario de titularidade municipal.

O delegado territorial da Xunta en Lugo, Javier Arias, desprazouse hoxe ao lugar xunto co rexedor do municipio, José Luis Rivera, co fin de avaliar sobre o terreo as posibles solucións para devolver a plena operatividade á vía nesa zona. O Goberno galego e o Concello de Quiroga están a estudar conxuntamente o mellor xeito de proceder para reparar canto antes o tramo afectado, duns dez metros de lonxitude e, de feito, en breve comezarán os traballos para desescombrar e aplanar o terreo nese punto. Á espera da intervención, habilitouse un paso provisional para garantir o acceso ás catro aldeas en caso de necesidade.

Arias puxo en valor a “relevancia da colaboración institucional” para “resolver incidencias e facilitar a vida dos veciños e veciñas”, como tamén se puxo de manifesto a semana pasada co apoio da Xunta ao operativo de rescate das xovencas dun particular que caeron por un barranco de moi difícil acceso en San Xián de Ínsua, en Taboada.