Noia (A Coruña),  8 de xuño  de 2026

A delegada da Xunta na Coruña, Belén do Campo, acompañada pola directora territorial da Consellería de Vivenda e Planificación de Infraestruturas, Begoña Freire,  visitou hoxe a zona na que se construirá a futura senda peonil e ciclista paralela á estrada AC-550 ao seu paso polo concello de Noia, unha actuación estratéxica impulsada pola Xunta que suporá un investimento de máis de 1,6 millóns de euros.

Durante a visita, a representante do Goberno galego informou da apertura este venres do trámite de información pública do proxecto, aprobado provisionalmente polo Consello da Xunta, e destacou a importancia dunha intervención que permitirá mellorar a seguridade viaria, fomentar unha mobilidade máis sostible e favorecer os desprazamentos a pé e en bicicleta entre os núcleos de Noia, Taramancos e Boa.

Segundo indicou a delegada da Xunta, o proxecto sométese agora a información pública durante un prazo de 30 días, tanto aos efectos previstos na Lei 8/2013, de estradas de Galicia, como para a tramitación expropiatoria necesaria para a execución das obras. A actuación require a expropiación de 33 parcelas no termo municipal de Noia.

Belén do Campo lembrou que o obxectivo da Xunta é aprobar definitivamente o proxecto de trazado durante o terceiro trimestre deste ano e contar co proxecto construtivo no último trimestre de 2026, co fin de avanzar na licitación dunha infraestrutura que terá un prazo estimado de execución de dez meses.

Itinerario seguro e accesible

Belén do Campo explicou que o obxectivo desta actuación é habilitar un itinerario seguro e accesible que dea resposta a unha demanda histórica da veciñanza, nunha contorna con elevada intensidade de tráfico e na que actualmente moitos peóns se ven obrigados a transitar por zonas con limitadas condicións de seguridade.

A senda executarase en dous treitos independentes paralelos á AC-550 nun tramo total de 1,6 quilómetros. O primeiro desenvolverase entre os puntos quilométricos 74+570 e 75+635, pola marxe esquerda da vía, conectando o núcleo urbano de Noia, onde rematan actualmente as beirarrúas, co lugar de Taramancos. O segundo treito discorrerá pola marxe dereita da estrada, entre os puntos quilométricos 76+550 e 77+090, unindo a contorna de Taramancos coa baixada á praia de Boa.

O proxecto contempla a execución dunha senda de uso compartido peonil e ciclista, cun ancho superior aos dous metros, cunha beiravía de 1 metros de ancho elevada 4 centímetros sobre a beiravía, e cun pavimento de 14 centímetros de espesor en cor terriza, incorporando ademais medidas específicas de accesibilidade. Entre elas inclúense pavimentos podotáctiles nos cruces con outras estradas, nas ramplas e nas paradas de autobús, así como sinalización adaptada para facilitar a mobilidade das persoas con discapacidade visual.

A actuación inclúe tamén diversas obras complementarias destinadas a garantir a funcionalidade e seguridade do itinerario, como a pavimentación de accesos e entradas a parcelas, actuacións de drenaxe, reposición de firmes e adaptación de servizos afectados. Neste ámbito, prevese o traslado da parada de autobús situada no punto quilométrico 75+440 a unha localización máis accesible, así como a substitución da marquesiña existente para mellorar o servizo aos usuarios do transporte público.

A delegada concluíu destacando que esta actuación se enmarca na estratexia do Goberno galego para impulsar unha mobilidade máis segura, saudable e respectuosa co medio ambiente, mellorando a conectividade entre núcleos urbanos e rurais, reforzando a cohesión territorial e contribuíndo á mellora da calidade de vida da cidadanía. O proxecto conta co financiamento do Programa Operativo FEDER Galicia 2021-2027.

A delegada tamén informou ao rexedor de que a Xunta está a realizar un importante esforzo en investimento en conservación de estradas da rede autonómica no 2026  cun récord histórico, con 71,6 M€.

Belén do Campo recalcou que “se trata do maior investimento da historia da Xunta en materia de conservación e mantemento viario, reforzando así un modelo baseado na planificación, a seguridade viaria e a mobilidade segura en todo o territorio galego”. Neste senso lembrou que Galicia conta cunha rede autonómica de preto de 5.500 quilómetros, polo que a conservación constitúe “unha prioridade estratéxica” para garantir a conectividade, a competitividade económica e a cohesión territorial.