Madrid, 22 de novembro de 2022 O presidente da Xunta, Alfonso Rueda, resaltou a contribución de Galicia ao progreso común coa súa aposta polo desafío demográfico, os fondos europeos e novas oportunidades de futuro. Na súa intervención nun almorzo informativo organizado pola axencia de noticias Europa Press, o titular do Goberno galego subliñou a contribución de todas as Comunidades para “construír España, o que é non só un dereito dos nosos territorios, senón un deber”.

Neste sentido, Alfonso Rueda recordou que esta semana se cumpre un ano desde a celebración do coñecido como Foro de Santiago, no que representantes de oito comunidades autónomas de diferentes cores políticas se xuntaron para avanzar en materia de servizos públicos e financiación autonómica. O presidente da Xunta asegurou que Galicia “seguirá contribuíndo lealmente a facer un país mellor” desde diferentes eixes; fundamentalmente, coa súa aposta polo desafío demográfico, coa xestión dos fondos europeos e coa creación de novas oportunidades de futuro.

No referido á loita contra o despoboamento, destacou a gratuidade total das escolas infantís para os nenos e nenas menores de 3 anos. “Somos a única comunidade de España que ofrece unha medida así”, incidiu. En palabras do presidente, Galicia “está a actuar ante un problema do que non se pode ser só comentarista” e puxo en valor outras medidas como a Lei de impulso demográfico, a creación de casas niño nos pobos do rural ou a entrada en vigor dun dos calendarios de vacinación infantil máis completos de España.

A maiores, recordou as políticas practicadas para o retorno dos galegos no exterior e dos seus descendentes, o que motivou, en cinco anos, o regreso de 28.000 persoas, o 60% delas menores de 45 anos e cunha boa formación nos seus países de orixe.

Rueda destacou que “Galicia seguirá sendo a Comunidade que máis intensamente apoia as familias” e que a partir do 2023 equiparará as unidades familiares con dous fillos coas numerosas a efectos fiscais. O titular da Xunta lembrou que isto suporá unha dedución de 250 euros por familia, así como a bonificación adicional de 250 euros por cada fillo a partir do terceiro.

Así e todo, advertiu que hai cuestións na atención á poboación que non poden xestionar só as Comunidades autónomas, como pasa coa Sanidade pola falta de médicos, “un problema que afecta a todos os territorios e que hai que solucionar de raíz”. Neste sentido, instou unha vez máis ao Goberno central a ampliar o número de especialistas cunha convocatoria de prazas MIR extraordinaria e a crear a especialidade de Urxencias.

O presidente lamentou tamén que unha política excesivamente centralizada deixe de lado asuntos clave para a vertebración de Galicia, como o Corredor Atlántico de Mercadorías ou a xestión do litoral, que Galicia reclama por ser quen coñece mellor o seu territorio e a súa costa.

Descentralización dos fondos europeos

Recordou que Galicia non é allea á crise económica xeral, nun contexto de inestabilidade pola guerra en Ucraína cando aínda a sociedade non se recuperara dos efectos da pandemia. Porén, Rueda subliñou que neste momento era máis necesario que nunca apuntalar as oportunidades para as vindeiras xeracións, que doutro xeito “non nolo perdoarían xamais”, con empregos dignos e capacidade de acceso a unha vivenda que lles “ofreza oportunidades” para desenvolver un proxecto de vida. Nese senso, lembrou o programa de avais que vén de lanzar o Goberno galego para cubrir con axudas autonómicas o 20% que non soen ofrecer as entidades bancarias nos préstamos hipotecarios.

Alfonso Rueda tendeu a man para seguir contribuíndo desde Galicia ao progreso de España “como o fixemos sempre, sendo unha Comunidade amable e un exemplo de estabilidade”.