Ferrol, 8 de agosto de 2024

A delegada territorial da Xunta en Ferrol, Martina Aneiros, visitou esta mañá aos participantes no programa Camiño cara a corresponsabilidade dende a corresponsabilidade, unha iniciativa posta en marcha polo Patronato Concepción Arenal e financiada con cargo á liña de axudas para facilitar a conciliación  Plan Corresponsables para actuacións de conciliación de entidades sen ánimo de lucro que promove a Consellería de Política Social e Igualdade.

Este é un dos programas das 16 entidades galegas, entre as que tamén se atopa a Asociación de Movilidad Humana para a Colaboración y el Desarrollo, que este ano se beneficiaron da liña de axudas a entidades sociais para o desenvolvemento de iniciativas que faciliten a conciliación e a corresponsabilidade dotado con preto de 300.000 euros de orzamento.

A iniciativa que se desenvolve durante todo o ano e que conta cunha achega autonómica de 50.000 euros, propón un servizo de coidador para as familias usuarias da entidade a través da realización de diferentes actividades de carácter lúdico. A través deste programa, o Patronato Concepción Arenal leva atendido desde outubro de 2023 a 168 menores de entre 6 e 13 anos.

Co Plan Corresponsables o Goberno galego apoia o desenvolvemento de actuacións orientadas a facilitar a conciliacion das familias con menores ao cargo de ata 16 anos de idade mediante a creación de bolsas de coidado profesional, a través da creación de emprego de calidade no sector dos coidados e plans de formación e sensibilización en corresponsabilidade e coidados destinados aos homes e ás familias.

Martina Aneiros destacou o importante labor que desenvolven as entidades de carácter social como o Patronato Concepción Arenal no ámbito da igualdade de xénero, “un traballo que a Xunta apoia a través de dúas convocatorias -unha delas o Plan Corresponsables- que suman 2,3 millóns de euros”. Esta aportacións, segundo indicou Aneiros, permiten ás entidades “desenvolver programas de atención especializada a mulleres en situación de especial vulnerabilidade, así como iniciativas que facilitan a conciliación e a corresponsabilidade das familias con menores ao cargo de ata 16, como é o caso do programa que leva a cabo o Patronato Concepción Arenal”.