Santiago de Compostela, 1 de outubro de 2024

A Xunta de Galicia leva realizados traballos de rexeneración dos bancos marisqueiros sobre unha superficie de case 2,2 millóns de m2 desde o 2010. Ademais, abordouse a descompactación do substrato en máis de 8 millóns de m2 e a sementeira de especies marisqueiras en máis de 3,7 millóns de m2. Así o manifestou a directora xeral de Desenvolvemento Pesqueiro da Consellería do Mar, Marta Villaverde, na súa comparecencia na Comisión 8ª do Parlamento sobre as actuacións e valoración do exercicio das competencias da Xunta en materia de marisqueo.

Por outra banda, detallou que o Goberno galego apoiou á adquisición polo sector de 277 millóns de unidades de especies autóctonas de bivalvos e máis de 60 millóns de unidades de ameixa xaponesa para a realización do sementado nas zonas produtivas. Nesta liña, sinalou que a Consellería do Mar asignou un encargo á empresa pública Seaga para a recuperación e rexeneración das zonas de produción nos bancos de libre marisqueo. Nos proxectos levados a cabo nestes anos inclúense, avaliacións de idoneidade de determinadas accións, execución destas accións e de outras avaliadas en proxectos anteriores e seguimento das xa executadas para comprobar os resultados.

A directora xeral resaltou os avances relativos ao Plan de Competitividade e Sostibilidade do Marisqueo en Galicia , deseñado en coordinación co sector,  que permitiu poñer a disposición de sector máis de 50 millóns de euros para o desenvolvemento de medidas de apoio aos profesionais afectados pola paralización da actividade extractiva, en medidas de apoio á conservación e restauración da biodiversidade e dos ecosistemas mariños e á mellora das zonas de produción, entre outras.

Nesta liña, esbozou as distintas liñas de traballo que se está abordando desde organismos como o Centro de Investigacións Mariñas (CIMA), o instituto Tecnolóxico para o Control do Medio Mariño (Intecmar) ou na plataforma Redemar, ferramenta pioneira de colaboración entre os centros científicos e o sector. Unha labor na que tamén participan as universidades galegas e que están axudando a avanzar na optimización e mellora do proceso de obtención de semente, na obtención de estirpes resistentes aos cambios ambientais e a enfermidades que condicionan a súa viabilidade ou no estudo do estado dos bancos marisqueiros e as variables que inflúen na súa produtividade.

Factores múltiples

A responsable autonómica explicou que os factores que afectan á produción marisqueira son múltiples, entre os cales destacan os antropoxénicos, ambientais, meteorolóxicos ou os oceanográficos. Por iso recordou os efectos negativos de patoloxías como a Marteilia cochillia no berberecho, os episodios de baixa salinidade, a crise económica do 2008, a provocada por mor da Covid-19 así como os cambios dos ventos predominantes nas rías que afectan á presenza de nutrientes nas augas, entre outras. Para responder con eficacia a todos estes desafíos o Goberno galego, reforzou os recursos destinados a proxectos de investigación mariña superando os 4 millóns de euros.