Santiago de Compostela, 11 de outubro de 2024

O director xeral de Planificación e Ordenación Forestal, José Luis Chan, reuniuse este mediodía con representantes da Asociación Forestal de Galicia (AFG), concretamente co seu director, Xosé Covelo, e co responsable económico da entidade, Daniel Rodríguez. Na xuntanza, na que tamén participaron técnicos da Dirección Xeral, avaliouse, entre outros asuntos, a positiva incidencia no sector forestal galego das últimas ordes de axudas xestionadas pola Consellería do Medio Rural.

De maneira especial, puxéronse en valor as subvencións para fomentar a constitución de agrupacións forestais de xestión conxunta, cuxa resolución se publicou hai uns días no Diario Oficial de Galicia e que van permitir a creación de 20 novas entidades deste tipo cun investimento por parte da Xunta de máis de 775.000 euros.

Outros temas abordados neste encontro entre o director xeral e os directivos da AFG foron os relacionados cos instrumentos de ordenación forestal, os convenios coas comunidades de montes veciñais en man común, o uso social e recreativo dos montes privados ou os contratos temporais de xestión pública.

A Consellería do Medio Rural e a Asociación Forestal de Galicia manteñen diferentes vías de colaboración nestas e outras materias de interese para o sector e esta reunión veu reforzar ese labor conxunto a prol da ordenación e planificación dun monte galego diverso e sustentable, tanto dende o punto de vista económico como social e ambiental.