Ferrol, 12 de febreiro de 2025

A delegada territorial da Xunta en Ferrol, Martina Aneiros, mantivo esta mañá unha reunión de traballo coa directiva da Asociación de Jóvenes Empresarios (AJE) Ferrolterra, na que puxo en valor o reforzo aos apoios ao tecido autónomo activado polo Goberno galego co lanzamento por primeira vez dunha orde unificada de axudas específicas para este colectivo.

Durante o encontro, no que participaron a presidenta da entidade, vicepresidente, secretario e vogal, Yadira Tenreiro, Ismael Rivera, Raúl Lomba e Bruno Otero, respectivamente, Aneiros debullou as cinco liñas dispoñibles dentro desta convocatoria única, cofinanciada parcialmente pola Unión Europea a través do Programa FSE+ Galicia 2021-2027 e dotada de máis de 40,7 M€.

“O obxectivo da Xunta é o de avanzar na simplificación administrativa e na redución da carga burocrática para este sector estratéxico da nosa economía”, sinalou a delegada territorial.

Detallou que esta convocatoria inclúe programas de inicio de actividade como o programa de promoción do emprego autónomo e da cota cero dotados de 28,9 M€, e outros de consolidación e mantemento da actividade como o Bono Autónomo, (8 M€) para a mellora da competitividade; o Bono Nova Oportunidade (1,5 M€) e o Bono Remuda (1,2 M€) para facilitar a transmisión de negocios rendibles.

A orde inclúe tamén o programa de conciliación (1 M€) co que a Xunta apoia a contratación, por parte dos autónomos, dunha persoa desempregada para cubrir a súa baixa de maternidade ou paternidade, ou por risco polo embarazo ou a lactancia, e para o coidado de menores, maiores ou dependentes.

Aneiros informou tamén que, de forma complementaria a esta orde unificada, o Goberno galego vén de convocar as axudas para a contratación do primeiro, segundo e terceiro traballador por parte de autónomos, ás que se destinan 1,35 M€.

Tanto a orde unificada como a específica de contratación permanecerán abertas ata o día 30 de setembro.